Balqashtaǵy túzeý mekemesindegi jaǵdaı turaqtaldy
ASTANA. 11 shilde. QazAqparat /Jasulan Amanbaıuly / - Qaraǵandy oblysy, Balqash qalasyndaǵy jalpy rejımdegi AK-159/21mekemesinen qashyp shyqpaq bolǵan sottalǵandardyń qylmystyq áreketteriniń aldy alyndy.
Bul týraly búgin Astanada Qylmystyq atqarý júıesi komıteti tóraǵasynyń orynbasary Talǵat Ahmetov málim etti.
Eske sala keteıik, Balqash qalasynyń túzeý orynyndaǵy búlik búgin túngi 1.30-da oryn alǵan edi. T. Ahmetovtyń aıtýynsha, kezekshi narıadqa shabýyl jasap, mekemeniń 4 qyzmetkerin jaraqattaǵan 16 adamnan quralǵan qylmystyq top búlikti basý operatsııasy bastalǵan kezde óndiristik aýmaqqa enip, sonda jasyrynǵan. Arnaıy jasaq atalǵan aýmaqqa jaqyndaǵan kezde qylmysker top óz-ózderin jarý áreketin jasaǵan. Mamandardyń aıtýynsha, olar sol aýmaqta ornalasqan gaz ballonyn jaryp jibergen. Qazirgi ýaqytta úıindilerdiń astynan qylmyskerlerdi izdestirý sharalary júrgizilýde.
Ázirge qurban bolǵandar jóninde esh aqparat joq. Búlik bastalǵan kezde atalmysh mekemede 100-den asa sottalǵandar bolǵan. Ókinishke oraı, der kezinde kórsetilgen jedel medıtsınalyq kómekke qaramastan, baqylaý qyzmetiniń áskerı qyzmetshisi 1988 jylǵy Janserik Qashymbetov qaza tapty. Qylmystyq atqarý júıesi komıteti tóraǵasynyń orynbasarynyń aıtýynsha, qazirgi ýaqytta túzeý mekemesindegi jaǵdaı turaqtaldy.
