Balqashtaǵy toptasyp zorlaý isine qatysty sot otyrysy bastaldy
QARAǴANDY. QazAqparat - Balqash turǵynyn toptalyp zorlaǵan atyshýly oqıǵaǵa kúdikti eki azamattyń isine qatysty sot otyrysy bastaldy, dep habarlaıdy «QazAqparat» HAA tilshisi.
Sot otyrysy jabyq kúıde ótedi.
Eki sottalýshynyń isine qatysty Qylmystyq kodekstiń úsh baby - 125 bap, 2 tarmaq «Adam urlaý», 121 bap, 2 tarmaq «Seksýaldy sıpattaǵy kúshteý áreketteri» jáne 120 bap, 2 tarmaq «Zorlaý» boıynsha is qozǵaldy.
Sottalýshylar qazir qamaýda otyr.
Ózin urlap áketip, zorlaýdyń qurbany bolǵan jábirlenýshi Almatyda baspasóz konferentsııasyna shyqqannan keıin is kóptiń nazaryna ilikti. Іs Qaraǵandy oblysy prokýratýrasynyń baqylaýyna alynyp, qalalyq ishki ister bóliminen óńirlik ishki ister departamentine berildi.
Aıta keteıik, Nurgúl Qusylbekovanyń polıtsııaǵa málimdeýinshe, 2016 jyldyń tamyz aıynda Balqash qalasynyń eki turǵyny ony beıit basyna aparyp, qorlaǵan. Olar ony qabir qazýǵa májbúrlep, kúrekpen soqqyǵa jyqqan. Tabandy túrde prokýratýra men polıtsııaǵa júgingeni úshin ózin jábirleýshilerdiń keginen qoryqqan ol Balqashtan ketip, Temirtaý qalasynda páter jaldap turǵan.
