Balqashtaǵy atyshýly zorlyq oqıǵasynyń kýágeri jalǵan málimet bergen
QARAǴANDY. QazAqparat - Balqash turǵynyn urlaý jáne toppen zorlaý isine qatysty kýáger jalǵan túsinik bergeni úshin sottaldy, dep habarlaıdy «QazAqparat» HAA tilshisi.
Bul is zorlyqtyń qurbany bolǵan Nurgúl Qusylbekovanyń Almatydaǵy baspasóz máslıhatynda sóılegen sózinen keıin rezonans týdyrǵan edi. Tergeý barysy Qaraǵandy oblystyq prokýratýrasynyń baqylaýyna alynyp, qalalyq ІІB-den óńirlik ishki ister departamentiniń tájirıbeli tergeýshisi, tergeý basqarmasy bóliminiń bastyǵy Tatıana Rybalkınaǵa berildi.
Aldyn ala tergeýde belgili bolǵandaı, zardap shegýshiniń tanysy eki kúdiktini jaqtap, jalǵan kýálik etken. Zardap shegýshiniń sózine qarama-qaıshy túsinik bergen kýáger óz aıtqanynan qaıtpaǵan. Tergeýshi 36 jastaǵy áıeldi QR QK 420-baby «qasaqana jalǵan kýálik etý» boıynsha qylmystyq jaýapqa tartty. Іs Balqash qalalyq sotyna berilip, Balqash sýdıasy Aınur Jandıldına aıypkerdi kináli dep tanyǵan jáne onyń kámeletke tolmaǵan eki bala tárbıelep otyrǵanyn eskerip, ony shartty túrde 2 jyl 6 aıǵa bas bostandyǵynan aıyrdy.
«Únsiz qalma» respýblıkalyq qozǵalysynyń belsendisi, zardap shegýshiniń qoǵamdyq ókili Dına Smaılovanyń aıtýynsha, sottalýshy áıel Qylmystyq kodekstiń 432-babynda kózdelgen qylmysty jasyrǵany, sondaı-aq QK 28-baby «qylmystyq quqyq buzýshylyqqa qatysýshylyq» boıynsha úshin jaýapqa tartylýy tıis.
Sondaı-aq, zardap shegýshiniń advokaty sottalýshylardan moraldyq zardap úshin ótemaqy óndirý týraly azamattyq ótinim bergen. Talap etilgen soma - 60 mıllıon teńge. Ár kúdiktiden 30 mıllıon teńge talap etýde. Qazir sot tyńdalymy jabyq ótip jatyr. Іsti sýdıa Marat Bashanov qaraýda.
Eske salsa keteıik, osy jyldyń aqpanynda Balqash turǵyny Nurgúl Qusylbekovany eki er adam aıaýsyz zorlap, zıratqa aparyp, ózine kór qazýǵa májbúrlegen edi.
