Balqashtaǵy jaǵajaı qaýipsizdigi tájirıbesi Alakólge engizilýi múmkin - mınıstrlik
ASTANA. KAZINFORM – Balqashta abattandyrylǵan tórt jaǵajaıda demalýshylardyń sýǵa túsetin aýmaǵy men sý kólikteriniń júretin baǵyty bólingen. Endi osy tájirıbeni Alakóldiń jaǵalaýynda da qoldaný usynylyp otyr. Bul týraly Quryltaıda ótken dóńgelek ústelde Týrızm ındýstrııasy komıtetiniń tóraǵasy Nurbol Baıjanov aıtty.
– Bıylǵy oń tájirıbeni odan saıyn kúsheıtip, basqa kýrorttyq aımaqtarǵa da usynatyn bolamyz. Mysaly, Balqashta 1,4 mlrd shamasynda tórt jaǵalaý abattandyrylyp, onda týrısterdiń sýǵa túsetin jaǵalaýlary arnaıy oqshaýlanyp, sýdaǵy kóliktiń jeke marshrýty boldy. Osynyń arqasynda qaýipsizdik qamtamasyz etildi. Endi bul tájirıbeni biz Jetisý jáne Abaı oblysyna usynatyn bolamyz, – dedi ol.
Dóńgelek ústelde 2026 jylǵy týrıstik maýsymnyń qorytyndysy men kelesi jylǵa daıyndyq barysy da talqylandy. Qatysýshylar joldardyń jaı-kúıi, kólik qatynasynyń qoljetimdiligi, kommýnaldyq ınfraqurylymnyń daıyndyǵy jáne demalýshylardyń qaýipsizdigi máselelerin kóterdi.
Jıynda Alakól jaǵalaýyn nyǵaıtýǵa bólingen 25 mlrd teńgeden astam qarajattyń tıimdi jumsalýy da sóz boldy. Kásipkerler men sala mamandary jaǵalaýdy bekitý jobalary kóldiń tabıǵı erekshelikterin eskerip, uzaq merzimdi nátıje berýi keregin atap ótti.
Talqylaý qorytyndysy boıynsha Úkimet pen jaýapty memlekettik organdarǵa joldanatyn usynymdar ázirleý josparlanyp otyr.
Buǵan deıin Alakól jaǵalaýyn nyǵaıtýǵa 25 mlrd teńgeden astam qarjy bólingeni týraly jazǵan edik.