Balqashtaǵy ólimmen aıaqtalǵan tóbeles: úsh adamǵa sot úkimi shyqty
ASTANA. KAZINFORM — Qaraǵandy oblysynda Balqashtaǵy tóbeles kezinde adam ólimine ákelgen is boıynsha sot ótti. Tóbeleske qatysqandar jábirlenýshini qatty soqqyǵa jyǵyp, ol alǵan jaraqattarynan aýrýhanada kóz jumǵan.
Qaraǵandy oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda adamdar tobynyń aldyn ala sóz baılasýymen jasalǵan, abaısyzda adam ólimine ákep soqqan densaýlyqqa qasaqana aýyr zııan keltirý faktisi boıynsha qylmystyq is qaraldy.
2025 jylǵy 22 jeltoqsanǵa qaraǵan túni Balqash qalasynda kámeletke tolmaǵan A. sottalýshylar A. jáne Q.-men birge tóbeles barysynda jábirlenýshi J.-nyń bas tusyna judyryqpen jáne aıaqpen birneshe ret soqqy jasap, denesine kóptegen jaraqat salǵan, alǵan jaraqattarynyń saldarynan jábirlenýshi aýrýhanada qaıtys bolǵan.
Sottalýshylardyń kinási kýálardyń kórsetýlerimen, beınejazbamen, saraptamalardyń qorytyndylarymen jáne is boıynsha basqa da materıaldarmen tolyq dáleldendi.
Prokýror kámeletke tolmaǵan A.-ǵa 8 jyl merzimge, al sottalýshylar A. jáne Q.-ǵa árqaısysyna 9 jyl merzimge bas bostandyǵynan aıyrý jazasyn taǵaıyndaýdy surady.
Jaza taǵaıyndaý kezinde sot kámeletke tolmaǵan A.-ǵa qatysty qylmystyq jaýaptylyq pen jazany jeńildetetin mán-jaı retinde onyń kámeletke tolmaǵanyn tanydy. Sottalýshylardyń qylmystyq jaýaptylyǵy men jazasyn aýyrlatatyn mán-jaılar anyqtalmady.
— Sot úkimimen kámeletke tolmaǵan A. kináli dep tanylyp, oǵan 8 jyl merzimge, al A. jáne Q.-ǵa árqaısysyna 9 jyl merzimge bas bostandyǵynan aıyrý jazasy taǵaıyndaldy. Jábirlenýshi taraptyń moraldyq zııandy óndirý týraly azamattyq talaby ishinara qanaǵattandyrylyp, 10 000 000 teńge óndirildi, ókildik shyǵyndar 3 500 000 teńge óndirildi. Sot úkimi zańdy kúshine engen joq, — delingen habarlamada.
Buǵan deıin Balqash jaǵalaýyna kóligimen kirip, demalýshylardy shoshytqan júrgizýshi 10 táýlikke qamalǵanyn jazdyq.
