Balqashta jumysshynyń qoly stanokqa qysylyp, aýyr jaraqat aldy
BALQASh. KAZINFORM — Balqashta kásiporyndardyń birinde bolǵan jazataıym oqıǵaǵa baılanysty arnaıy tergeý júrgizilip jatyr. 47 jastaǵy jumysshy jaraqat alyp, aýrýhanaǵa jetkizildi.
Oqıǵa «Montajnık-EM» JShS-niń Balqashtaǵy óndiristik bólimshesinde tokarlyq jumystardy oryndaý kezinde bolǵan.
Aldyn ala málimetke sáıkes, 47 jastaǵy jumysshy tokar stanogynda bilikti najdak qaǵazymen tegisteý kezinde oń qoly stanokqa tartylyp ketip, aýyr jaraqat alǵan. Oqıǵadan keıin zardap shekken azamat Balqash qalasynyń ortalyq aýrýhanasyna jetkizildi.
Qaraǵandy oblysy boıynsha Memlekettik eńbek ınspektsııasy komıteti departamentiniń málimetinshe, jumys berýshi bolǵan jazataıym oqıǵa týraly ýákiletti organǵa resmı túrde habarlaǵan.
— Oqıǵaǵa baılanysty jazataıym jaǵdaıdy arnaıy tergep-tekserý jónindegi komıssııa quryldy. Qazirgi ýaqytta oqıǵanyń mán-jaıy men sebepteri anyqtalyp, jumys barysynda qaýipsizdik talaptarynyń saqtalýyna baǵa berilip jatyr, — dep habarlady Qaraǵandy oblysynyń eńbek ınspektsııasy.
Qaraǵandy oblysynyń densaýlyq saqtaý basqarmasy zardap shekken jumysshynyń jaǵdaıyn ortasha aýyr dep baǵalap, qazirgi kezde turaqty ekenin málimdedi. Naýqastyń sanasy anyq, dárigerlermen baılanysta.
— Operatsııalyq emnen keıin naýqastyń jaǵdaıy turaqty. Jalpy qan taldaýyn turaqty baqylaýdy qajet etetin postgemorragııalyq anemııa saqtalyp tur. Leıkotsıtarlyq reaktsııa bastapqy kórsetkishtermen salystyrǵanda tómendegen. Túzetýden keıin qannyń uıý júıesiniń kórsetkishteri turaqty, — dep habarlady vedomstvodan.
Oqıǵanyń naqty sebepteri, sondaı-aq óndiristegi eńbek qaýipsizdigi talaptarynyń saqtalýy jónindegi túpkilikti qorytyndy arnaıy tergeý aıaqtalǵannan keıin belgili bolady.
Aıta keteıik, buǵan deıin Jyl basynan beri óndiriste 727 jumysshy zardap shekkeni habarlanǵan edi.
