Balqashtaǵy demalys oryndarynyń birinde demalýshylar jappaı ýlanyp qaldy

ASTANA. KAZINFORM – Balqash kóliniń jaǵasyndaǵy demalys oryndarynyń birinde demalýshylar jappaı ýlanyp qaldy. Saldarynan 29 adam medıtsınalyq kómekke júgingen.

Densaýlyq saqtaý mınıstrliginiń baspasóz qyzmetine habarlasqanymyzda sol óńirdiń jaýapty mamandarymen baılanysqa shyǵýdy ótindi. 

Qaraǵandy oblysynyń sanepıdbaqylaý departamentiniń bas mamany Aıgúl Shatekovanyń málimetinshe, búgin Balqash qalasyndaǵy «Dosjan» otbasylyq ınternat úıiniń demalýshylary jedel ishek ınfektsııasyna shaldyǵýy múmkin degen kúdikpen medıtsınalyq kómekke júgingen. Dál qazir shıpa izdegen 29 adamnyń 18-i statsıonarda emdelip jatyr.

«Balqash qalalyq sanıtarlyq-epıdemıologııalyq baqylaý bóliminiń mamandary epıdemııaǵa qarsy sharalardy bastap, indet oshaǵyna anyqtaýǵa kiristi. Naýqastar arasynda saýalnama júrgizdi. Zerthanalyq zertteýlermen qatar tergeý bastaldy. Materıaldar protsessýaldyq sheshim qabyldaý úshin Balqash qalalyq polıtsııa bólimine berildi», - dedi Aıgúl Shatekova agenttik tilshisine bergen jaýabynda.

Esterińizge salsaq, buǵan deıin Ekibastuz qalasyndaǵy jergilikti meıramhanalardyń birinde adamdardyń tamaqtan jappaı ýlanýy tirkelgen edi.