Balqashta jylan shaqqan bala 22 kúnnen beri aýyr halde jatyr

BALQASh. QazAqparat - Jylan shaǵyp alǵan bala Balqash qalasynan Qaraǵandy balalar klınıkalyq aýrýhanasyna jetkizildi. Ol úsh aptadan astam ýaqyt jansaqtaý bóliminde aýyr halde jatyr, dep habarlaıdy QazAqparat tilshisi.

Qaıǵyly oqıǵa 22 maýsymda bolǵan.

Saǵat 23:45-te Balqash qalasynyń kópsalaly aýrýhanasyna sol qolyn jylan shaqqan bala jetkizilgen.

Balanyń jaǵdaıynyń nasharlaýyna baılanysty oblystyq konsılıým men respýblıkalyq telemedıtsınanyń usynysy boıynsha ol Qaraǵandy qalasynyń kópsalaly oblystyq balalar klınıkalyq aýrýhanasyna aýystyryldy.

«Búgingi tańda balanyń jaǵdaıy óte aýyr dep baǵalandy, balanyń ókpesi jasandy jeldetýge qosylǵan, qazir ol reanımatsııada. Barlyq qajetti em-dom jasalyp jatyr»,-dep habarlady Qaraǵandy oblysy densaýlyq saqtaý basqarmasynyń baspasóz qyzmeti.