Balqashta júk poıyzy qaǵyp ketken áıel mert boldy

BALQASh. QazAqparat – Qaza tapqan áıel Balqash qalasynyń Jumysshy kenti mańynda temir jol boıynan ótpek bolǵan. Qazir atalǵan fakti boıynsha tergeý amaldary júrgizilip jatyr, dep habarlaıdy QazAqparat tilshisi.

Marqum áıel - Balqash qalasy Jumysshy kentiniń turǵyny.

Qaıǵyly oqıǵa kent pen qala arasyndaǵy aralyqta temirjol boıynda oryn alǵan.

Qaza bolǵan kelinshek temir jol boıymen ótip bara jatqanda ony júk poıyzy qaǵyp ketken.

Aldyn ala málimet boıynsha, marqumnyń estý qabiletinde aqaý bolǵan.

Poıyz júrgizýshisiniń aıtýynsha, shuǵyl tejegishti basqanymen qaqtyǵysqa jol bermeýge múmkindik bolmaǵan.

Áıel alǵan jaraqatynan qaıtys boldy.

«Atalǵan fakti boıynsha Qaraǵandy-Suryptaý stantsııasyndaǵy jelilik polıtsııa bóliminde QR QK 344-babynyń 2-bóligi boıynsha is qozǵaldy. Qazirgi ýaqytta is boıynsha tıisti tergeý amaldary júrgizilip jatyr», - dep habarlady kólik polıtsııa departamentiniń baspasóz qyzmeti.

Sondaı-aq, vedomstvo tergeý aıaqtalǵansha ózge aqparatty jarııa etýge bolmaıtynyn habarlady.