Balqashta jol polıtsııasynyń qyzmetkeri qyzý júrgizýshiden 30 myń teńge para aldy
ASTANA. QazAqparat - Balqash qalasynyń jol-patrýldik polıtsııasy rota bóliminiń komandırine spırttik ishimdik iship, kólik basqarǵan júrgizýshiden para alǵany úshin aıyppul salyndy, dep habarlaıdy QazAqparat.
«Sotta málim bolǵanyndaı, komandır qyzmet babynda júrgendigine qaramastan alkogoldik ishimdik iship alyp kólik basqarǵan júrgizýshiden ákimshilik hattama toltyrmaý úshin 30 myń teńge kóleminde para talap etken. Zań buzǵan azamattyń qarjysy bolmaýyna baılanysty olar sol kúni ózara kezdesetin bolyp kelisken», -dep habarlady Balqash qalalyq sotynyń ókilderi.
Alaıda, júrgizýshi kelisilgen somany ýaqytynda bermegen. Komandır bolsa, aqsha talap etip, oǵan birneshe ret telefon shalǵan. Polıtsııa qyzmetkeri para talap etýdi qoımaǵan soń júrgizýshi sybaılas jemqorlyqpen kúres organdaryna para alý áreketi boıynsha habar bergen.
«Kelesi kúni júrgizýshi komandırmen kelisip, oǵan 30 myń teńge kóleminde para berip, polıtsııa qyzmetkeri qylmys ústinde qolǵa tústi. Sot ony kináli dep taýyp, oǵan 1 mln 800 myń teńge kóleminde aıyppul salady jáne múlkin tárkilep, memlekettik qyzmette, memlekettik organdar men mekemelerde qandaı da bir laýazymdy qyzmet atqarýǵa tyıym saldy»,-dep habarlady sottyń baspasóz qyzmeti.
