Balqashta joǵalǵan eki balyqshy tabylmaı jatyr
TARAZ. QazAqparat - Balqash kólinde habar-osharsyz ketken eki balyqshyny izdeý jumystary jalǵasýda, dep habarlaıdy QazAqparat tilshisi Jambyl oblystyq TJD baspasóz qyzmetine silteme jasap.
Eske sala keteıik, 12 qarashada Jambyl oblysy, Moıynqum aýdanyndaǵy Myńaral aýylynyń tórt turǵyny Balqash kóline balyq aýlaýǵa baryp, habar-osharsyz ketken edi. Olardy izdeýge Qaraǵandy oblystyq TJD «Jedel qutqarý jasaǵy» MM qutqarýshylary jumyldyrylǵan. Artynsha, Jambyl oblystyq TJD Jedel qutqarý jasaǵynyń kúshteri kelip qosylǵan.
Sol kúni turǵyndar eki balyqshyny din aman tapqan. 13 qarashada jaǵalaýdan 700-800 metr aryda joǵalǵandardyń birine tıesili degen qorǵanys kostıýmy, sýǵa batqan aý tabylǵan. Bir balaqyshynyń ákesi onyń ulynyń tory ekenin rastaǵan.
TJD qyzmetkerleri Myńaral aýylynyń 25 jastaǵy eki turǵyny - E. Orynbekov pen D. Shoraevtyń izdestirilip jatqanyn jetkizdi.
«Іzdeýge 5 súńgýir, 32 jergilikti turǵyn jumyldyrylǵan. Paıdalanylyp jatqan 5 júzý quralynyń tórteýin balyq zaýyty men jergilikti turǵyndar bergen. Joǵalǵandardy uzyndyǵy 1500 metr bolatyn súzekimen izdep jatyr. Aýdarylǵan kater men tor tabylǵan mańaıda 1 shaqyrymnan astam keńistik tekserildi», - deıdi baspasóz qyzmetiniń ókilderi.
TJD sıtýatsııalyq ortalyǵynda jedel shtab qurylyp, 51-35-75 nómirimen «jedel jeli» jumysy uıymdastyrylǵan.
Qosymsha TJD Jedel qutqarý jasaǵynyń 4 qyzmetkeri «ÝAZ» avtomobılimen jiberildi, júzý quraly bólindi. Tarazdan Eýrokopter-145 UP-ES027 tikushaǵy ushyryldy. Oqıǵa ornyna TJD bastyǵynyń orynbasary Talǵat Sabyrov keldi.
Aldyn ala málimetterge qaraǵanda balyqshylar alaı-dúleı jel men tolqyn saldarynan joǵalǵan.
Kúnniń sýytýy, ekpindetken jel jáne kól betiniń muzdaýy izdeý jumystaryn qıyndatyp jatyr. Qazir Balqashtyń betinde 2-10 sm aralyǵynda muz qaptaǵan.
Tótenshe jaǵdaı departamentiniń málimdeýinshe, qazan-qarasha aılarynda Jambyl oblysy aýmaǵynda 2 adam sý betinde qaıtys bolyp, 3 adam batyp ketken.
