Balqashta jas dárigerlerge jańa páterler berildi
ASTANA. QazAqparat - Qaraǵandy oblysynyń Balqash qalasynda 18 jas medıtsına qyzmetkerleri qonys toıyn atap ótti. Baspana retinde syılyqty olar qalanyń mereıtoıy qarsańynda aldy. Jańa páterlerdiń kiltterin dárigerlerge aımaq basshysy Erlan Qoshanov metallýrgter qalasyna sapary barysynda tabys etti.
«Bul qalanyń 80 jyldyǵyna qarsy óte jaqsy syılyq. Sondaı-aq, men Balqash qalasynyń basshylyǵyn da quttyqtaǵym kelip otyr. Sebebi sizderde endi mamandar tapshylyǵy máselesi de sheshimin taýyp jatyr. Endi munda nárestelerdi qaraıtyn neonatolog maman da bar. Taǵy bir qýanyshty jaıt - bizdiń aımaǵymyzǵa basqa oblystardan jas mamandardyń aǵylyp kelip jatqany. Demek, Balqash damyp, órkendep keledi», - dedi Erlan Qoshanov quttyqtaý sózinde.
Jalpy, dáriger Dılnoza Mırhaıdarova Balqash qalasyna Ońtústik Qazaqstan oblysynan kóship kelgen. Q.A. ıAssaýı atyndaǵy Halyqaralyq qazaq-túrik lıtseıiniń túlegi Balqash qalasynyń №1 emhanasynda jumys isteıdi.
«Men páter alǵanyma óte qýanyshtymyn, - dedi Dılnoza áriptesteriniń atynan alǵysyn bildirip. - Balqashta jas dárigerlerge barlyq jaǵdaı jasalýda. Bizge artqan úmitti aqtaýǵa tyrysamyz».
Balqash qalasynda dárigerlerdi baspanamen qamtý úshin qalalyq kommýnaldyq menshikten oblystyq densaýlyq saqtaý basqarmasyna bos turǵan úıdiń bir kireberisi berilgen. Ony kúrdeli jóndeýden ótkizýge oblystyq bıýdjetten 67,2 mln. teńge bólingen. «Balqash Jibek joly» merdiger kompanııasy qysqa merzimde - tórt aı ishinde jóndeý jasap úlgergen.
Kireberiste 18 páter bar, onyń ishinde úsh-úshten tórt bólmeli jáne eki bólmeli, 7 - úsh bólmeli, 5 - bir bólmeli páter bar. Olardyń barlyǵy elimizdiń ár oblystarynan kelgen jas dárigerlerge berildi.
2018 jyly Balqash qalasynda dárigerlerdi baspanamen qamtý úshin taǵy 12 páter jóndeledi dep josparlanýda.
