Balqashta jas dárigerler jataqhanaǵa ornalasty
QARAǴANDY. QazAqparat - Balqashta Prezıdenttiń bes áleýmettik bastamasyn oryndaý sheńberinde Balqashta medıtsınalyq kolledjdiń jataqhanasy kúrdeli jóndeýden ótkizildi, dep habarlaıdy Qaraǵandy oblysy ákiminiń resmı saıty.
Jańartylǵan ǵımaratta stýdentter úshin jaıly jaǵdaı jasalǵan. Barlyq nıet bildirýshilerdiń barlyǵy jatyn oryndarymen qamtamasyz etilgen, taǵy da stýdentterdi qabyldaý múmkindigi bar.
300 orynǵa shaqtalǵan bes qabatty jataqhana 1982-shi jyly salynǵan. 90-shy jyldary qıyn jaǵdaıǵa baılanysty ony ýaqytsha jabýǵa týra keldi, sonyń saldarynan barlyq kommýnıkatsııalar tozyp qalǵan. 2018-shi jyly kúrdeli jóndeý jasaý týraly sheshim qabyldandy. Jataqhanany jóndeý týraly jańalyq kolledj basshylyǵyn da, stýdentterdi de qatty qýantqan.
- Bizdiń kolledjde 500-den astam stýdent oqıdy, onyń jartysynan kóbisi - basqa qaladan kelgender. Qaraǵandy oblysynyń aýyldyq jerlerinen, Ońtústik Qazaqstannan keledi. Sondyqtan jataqhana máselesi óte ózekti, - dep atap ótti Balqash medıtsınalyq kolledjiniń dırektory Serik Pshenbaev. - Búgingi tańda 220 adam jataqhanaǵa zárý, al onyń syıymdylyǵy - 300 oryn. ıAǵnı bizde qazir oryn jetkilikti. Stýdentterdi qabyldaýdy ulǵaıtyp, akýsherlerdi daıarlaý múmkindigi bar. Bul mamandyq qazir suranysqa ıe.
Ǵımarattyń qasbeti, shatyry jóndelip, ishki árleý jumystary jasalǵan. Jańa terezeler, santehnıka men ınjenerlik kommýnıkatsııalar ornatylǵan. Qajetti jıhazdar men turmystyq tehnıka satyp alyndy. Endi árbir qabatta shomylatyn jerler, as úıleri, demalatyn bólmeler bar. Stýdentter de áserlerimen bólisti:
- Barlyǵy unaıdy. Munda bólmelerimiz jaıly jáne jyly. Barlyq jaǵdaı jasalǵan. Sektsııalarda kir jýǵysh mashınalar bar, ár bólmede tońyzytqyshtar ornatylǵan. Men Prıozerskiden keldim, úshinshi kýrsta oqımyn, medbıke bolamyn. Osyǵan deıin páter jaldap, aıyna 40 myń teńge jýyq aqsha tólep otyrýǵa májbúr boldym, -deıdi stýdent Áıgerim Janseıitqyzy.
Jataqhananyń bir qabatyn jas dárigerlerge bergen. Munda tolyqtaı jıhazy men turmystyq tehnıkasy bar 16 qyzmettik páterler jabdyqtalǵan.
Esterińizge sala keteıik, 2018-shi jyldyń naýryzynda Elbasy qazaqstandyqtar aldynda Bes áleýmettik bastamany jarııalaǵan bolatyn. Onyń úshinshi baǵyty joǵarǵy bilim sapasy men qoljetimdiligin arttyrý jáne stýdenttik jastardyń jataqhanalarda ornalasýyn qamtamasyz etý týraly aıtylǵan.
