Balqashta jaryqtyń sónýinen naýqastyń kóz jumǵany ras pa - mınıstrlik jaýaby

NUR-SULTAN. QazAqparat – Densaýlyq saqtaý vıtse-mınıstri Ajar Ǵınııat Qaraǵandy oblysynyń Balqash qalasynda jaryqtyń óshýinen jansaqtaý bólimindegi naýqastyń kóz jumǵany týraly aqparatty joqqa shyǵardy, dep habarlaıdy QazAqparat tilshisi.

«Osydan eki apta buryn Balqashta ortalyq aýrýhanadaǵy jóndeý jumystaryna baılanysty elektr jaryǵy bir saǵatqa sóndirilgen. Dál osy ýaqytta avtomatty túrde kedergisiz qýat generatory iske qosyldy. Aýrýhanadaǵy naýqastardyń bári de tıisti deńgeıde emin jalǵastyrdy. Dál sol kúni eshkim qaıtys bolǵan joq», - dedi Ajar Ǵınııat OKQ-daǵy baspasóz máslıhatynda tilshilerdiń saýalyna oraı.

Eske sala ketsek, buǵan deıin OKQ-daǵy baspasóz máslıhatynda Densaýlyq saqtaý mınıstri Alekseı Tsoı búkil halyqty koronavırýsqa PTR-testiden ótkizý týraly jospar joqtyǵyn málim etti.

Sondaı-aq onyń aıtýynsha, Qazaqstanda KVI juqtyrǵandardyń sany resmı derekten kóp bolýy múmkin.