Balqashtaǵy jańa mys qorytý zaýyty 1 200 adamǵa turaqty jumys beredi

Tıisti qaýlyǵa Premer-mınıstr Oljas Bektenov qol qoıdy.

Úkimettiń baspasóz qyzmetiniń habarlaýynsha, jańa óndiris Qaraǵandy oblysynyń Balqash qalasynda júzege asady. Jeke ınvestıtsııalardyń jalpy kólemi 750 mlrd teńge bolady.

Kásiporynnyń qurylysy 2027 jyly bastalady, 2030 jyly paıdalanýǵa beriledi dep josparlanǵan. Zaýyttyń óndiristik qýaty jylyna 300 myń tonna katodty mys, 10 tonna altyn, 300 tonna kúmis jáne 1,5 mln tonnadan astam kúkirt qyshqylyn óndirýge qaýqarly.

— Joba 1,2 myńǵa jýyq turaqty jumys ornyn ashýdy kózdeıdi. Kásiporyn iske qosylǵan kezde qyzmetkerlerdiń 90%-y, basshylyq laýazymdardy qosa alǵanda, qazaqstandyq mamandar bolady, aldaǵy bes jyl ishinde olardyń úlesi 95%-ǵa deıin artady. Sondaı-aq ınvestor Qaraǵandy oblysynyń oqý oryndarynda 50 stýdentti daıarlaý boıynsha mindettemeler alady, — delingen habarlamada.

Jańa qýattardy iske qosý el ishinde mys shıkizatyn qaıta óńdeý kólemin bir jarym esege arttyryp, jylyna 800 myń tonnadan astam kólemge ulǵaıtýǵa múmkindik beredi. Qosylǵan quny joǵary ónimniń eksporty jylyna 460 myń tonnadan 760 myń tonnaǵa deıin ósedi. Sonymen qatar óndiris zamanaýı tehnologııalarmen jáne tsıfrlyq sheshimdermen jabdyqtalady.

Osy jyldyń alty aıynyń qorytyndysy boıynsha óńdeý ónerkásibindegi óndiris kólemi 9,8%-ǵa ulǵaıdy. Ósim mashına jasaý, tamaq jáne hımııa ónerkásibi, munaı óńdeý, qurylys materıaldaryn shyǵarýda jáne basqa da salalarda baıqalady. Osy kezeńde elimizde 232 myń tonna katodty mys óndirildi.

Katodty mys — qosylǵan quny joǵary ónim shyǵarýdyń negizgi shıkizaty. Ol elektr kabelderi men jabdyqtaryn, qubyrlardy, qurylys materıaldaryn, avtomobıl bólshekterin, sondaı-aq qola, jez jáne basqa da mys qorytpalaryn óndirýde qoldanylady.

Eske salaıyq, buǵan deıin Oljas Bektenov Kaspıı jaǵasynda salynatyn keme jasaý zaýytynyń jobasyn qaraǵan edi.