Balqashta ustalǵan kúdiktini uryp-soǵyp, azaptaǵan 4 polıtseı sottaldy
Tórt polıtseıge kúdiktiniń densaýlyǵyna aýyr zııan keltirdi degen aıyp taǵyldy. Balqashtyń 44 jastaǵy turǵyny pedofılııa kúdigimen ustalǵan.
Tergeý materıaldary boıynsha 2019 jylǵy 30 qazanda polıtsııa bóliminiń ǵımaratynda bolǵan tórt polıtseı aıyptalýshydan onyń qylmys jasaǵanyn moıyndatý maqsatynda erekshe qatygezdikpen, qorlaýmen, sondaı-aq jábirlenýshini gaztutqysh pen taıaqshany paıdalana otyryp, azaptaǵany jáne tunshyqtyrǵany belgili boldy.
Dene jaraqatyn alǵan soń jábirlenýshi shuǵyl túrde Balqash qalasynyń ortalyq aýrýhanasyna jetkizilip, onda oǵan ota jasaldy.
Sottalýshylardyń kinási jábirlenýshiniń aıǵaqtarymen, tergeý áreketteriniń hattamasymen, saraptama qorytyndysymen jáne basqa da aıǵaqtarmen dáleldendi.
Prokýror sottalýshylardy kináli dep tanýdy jáne olardy 10, 9 jáne 8 jylǵa bas bostandyǵynan aıyrýdy suraǵan bolatyn.
Alaıda, qorǵaýshy tarap sottalýshylardy olardyń áreketinde qylmys quramynyń bolmaýyna baılanysty aqtaýdy surady.
«Jasalǵan qylmystyń sıpaty men qoǵamdyq qaýiptiligin, sottalýshylardyń qoǵam úshin joǵary qaýiptiligin, qylmystyq jaýaptylyq pen jazany aýyrlatatyn mán-jaılardyń bolýyn, jábirlenýshiniń qatań jaza taǵaıyndaý týraly pikirin, sondaı-aq sottalýshylardyń qylmys jasaǵannan keıingi minez-qulqyn eskere otyryp, sot sottalýshylardy qylmystyq-atqarý júıesi mekemesinde jazasyn óteı otyryp, 3 jyl merzimge memlekettik qyzmette qyzmet atqarý quqyǵynan aıyra otyryp, 10 jáne 9 jyldan bas bostandyǵynan aıyrýdy taǵaıyndady. Sonymen qatar, sot sottalýshylardy arnaıy ataqtardan aıyrdy. Eki sottalýshyǵa basqalaryna qaraǵanda qatań jaza taǵaıyndaýy olardyń jábirlenýshige fızıkalyq azap keltirýdegi belsendi róline baılanysty boldy», - dep habarlady Balqash qalalyq sotynyń baspasóz qyzmeti.
Úkim áli zańdy kúshine engen joq.