Balqashta týrızmdi damytýǵa nıettilerge jer ýchaskeleri usynylýda
QARAǴANDY. QazAqparat - Qazaqstandyq bıznesmenderge Balqash mańynda týrızmdi damytý usynylyp otyr. Jergilikti bılik bul maqsatta bos jer telimderin berýge jáne ınfraqurylym tartyp berýge daıyn ekenderin birdirdi, dep habarlaıdy QazAqparat tilshisi.
Balqash mańyndaǵy aımaq elimizdiń týrıstik nysandarynyń top-10 tizimine engen. Іshki jáne kirmelik týrızmdi damytý memlekettik baǵdarlamasy Balqashtyń bolashaq kýrort aýmaǵyn da qamtydy. 2023 jylǵa deıin kózdelgen Strategııalyq qujatty júzege asyrý josparyn QR Mádenıet jáne sport mınıstrligi «McKinsey & Company» kompanııasymen birlesip qurǵan.
Balqashta týrızmdi damytýǵa arnalǵan 60 ga bos jer bar. Barlyq nıet bildirýshiler ashyq aýktsıonǵa qatysa alady. Ol jaıly Balqash qalasynyń ákimi Aleksandr Aglıýlın óziniń halyq aldyndaǵy esebinde málimdedi.
Aıta ketý kerek, aldaǵy úsh jylda respýblıkalyq jáne jergilikti bıýdjetten Balqashtaǵy týrızm nysandaryna ınjenerlik ınfraqurylymdardy jalǵaýǵa 3,5 mlrd teńge bólinedi dep josparlanýda.
«Bul qarajatqa elektr taratý jelileri, joldardyń qurylysy, Bertis shyǵanaǵy mańynda káriz jáne sý qubyrlaryn ótkizý qarastyrylady», - dep naqtylady qala basshysy.
Ákimdiktiń málimetinshe, 2018 jyly Balqashta 28 myń týrıs bolyp qaıtqan, qonaqtarǵa 258 mln teńgege qyzmet kórsetildi. Bıylǵy jyly qalada kásipkerlerdiń basyn biriktirip, forým ótkizý josparlanyp otyr. Atalmysh jıynda týrıstik bıznesti jaqsartý máseleleri talqylanbaq.
