Balqashta tozyǵy jetken turǵyn úı qorynyń jańarýy nege keıinge shegerilip otyr
BALQASh. KAZINFORM – Alty júzden astam turǵyn úıi bar qalada tozyǵy jetken baspana máselesi áli de ózekti. Qabyldanǵan renovatsııa baǵdarlamasyna qaramastan, onyń júzege asýy ázirge ınvestorlardyń tapshylyǵyna tikeleı baılanysty bolyp otyr.
Balqash qalasynda 608 turǵyn úı bar, onyń bir bóligi apatty dep tanylǵan nemese apatty jaǵdaıǵa jaqyn tur. Qalalyq qyzmetterdiń málimeti boıynsha, qazirgi ýaqytta alty kópqabatty turǵyn úı resmı túrde apatty dep tanylǵan. Onyń tórteýi tolyqtaı, al ekeýi jekelegen qurylymdyq elementteriniń jaǵdaıyna baılanysty osyndaı mártebege ıe boldy.
Apatty dep tanylǵan úılerdiń mekenjaılary:
– Abaı kóshesi, 90;
– Balqash kóshesi, 24;
– Qaramende bı kóshesi, 25;
– Seıfýllın kóshesi, 15;
– Qaramende bı kóshesi, 10 (5 kireberis);
– Qazybekov kóshesi, 1 (1 kireberis).
Sonymen qatar taǵy bes kópqabatty turǵyn úı apatty jaǵdaıǵa jaqyn dep baǵalanýda. Olar Muhamedjanov shaǵyn aýdanyndaǵy №13, 6 jáne 19 úıler, Aǵybaı batyr kóshesi, 9 jáne Jeltoqsan kóshesi, 1 mekenjaıyndaǵy úıler.
2025 jyly júrgizilgen aǵymdaǵy jóndeý jumystary nátıjesinde Seıfýllın kóshesi, 33 jáne Bókeıhanov kóshesi, 1 mekenjaıyndaǵy úıler apatty jaǵdaı aldyndaǵy nysandar tiziminen shyǵaryldy.
Qazirgi ýaqytta ǵımarattardyń tehnıkalyq jaǵdaıy boıynsha jańa qorytyndylar alynbaǵan jáne qaıta tekserýden ótken úılerdiń tolyq tizimi qalyptaspaǵan. Degenmen, jaqyn arada tekseriletin nysandardyń aldyn ala tizimi anyqtaldy. Oǵan Baýyrjan Mýsınder kóshesi, 12; Balqash-1 stantsııasy, 32; Abaı kóshesi, 47 mekenjaılaryndaǵy úıler kiredi.
Balqash qalasy ákimdiginiń habarlaýynsha, 2024-2029 jyldarǵa arnalǵan turǵyn úı qoryn renovatsııalaý baǵdarlamasy bekitilgen. Baǵdarlama 2024 jylǵy 20 maýsymdaǵy №29/04 ákimdik qaýlysymen qabyldanyp, turǵyn úı qoryn jańartýdyń negizgi baǵyttaryn belgileıdi.
Alaıda, baǵdarlamanyń iske asýy qurylys kompanııalary men jeke ınvestorlardyń jetispeýshiligine baılanysty qıyndyqtarǵa tap bolyp otyr. Ákimdik ókilderi qurylys salýshylar men ınvestorlardyń bolmaýy basty kedergi ekenin atap ótti.
Qala bıligi turǵyn úıdi jańartý qarqyny ınvestorlardyń qatysýyna táýeldi ekenin moıyndaıdy. Qazirgi ýaqytta ınvestorlardy tartý jáne áleýetti seriktesterdi izdeý jumystary júrgizilip jatyr.
Apatty úılerde turatyn jáne jalǵyz baspanasy sol úıler bolyp tabylatyn menshik ıeleri memlekettik qoldaýǵa úmit arta alady. Muqtaj azamattar retinde esepke alynǵan jaǵdaıda, olar memlekettik turǵyn úı qorynan keıinnen satyp alý quqyǵymen jalǵa beriletin baspanamen qamtamasyz etiledi.
Aldaǵy 3-5 jylda ákimdik negizgi kúsh-jigerin ınvestorlardy tartýǵa baǵyttap, bul arqyly aýqymdy renovatsııany bastaýǵa nıetti. Investorlar tartylǵanǵa deıin turǵyn úı qoryn saqtaý maqsatynda shatyrlar men qasbetterdi jóndeý, ǵımarattarǵa biryńǵaı sáýlettik kelbet berý sııaqty sharalar júzege asyrylady.
Osylaısha, Balqash qalasynda turǵyn úı qoryn jańartý baǵdarlamasy bekitilgenimen, onyń júzege asýy úılerdiń tehnıkalyq jaǵdaıy men qalanyń ınvestıtsııalyq tartymdylyǵyna baılanysty bolyp otyr.
Osyǵan deıin Qoǵamdyq keńes otyrysynda Astana qalasynda renovatsııaǵa jatatyn turǵyn úı nysandarynyń tizbesin bekitý máselesi qaralǵany jaıly habarlaǵan bolatynbyz.
