Balqashta toppen zorlaý isi boıynsha aıyptalýshylar 13 jylǵa kesilýi múmkin
QARAǴANDY. QazAqparat - Prokýratýra toppen zorlaý isiniń eki fıgýrantynyń árbirine 13 jyl bas bostandyǵynan aıyrý jazasyn berýdi surap otyr, dep habarlaıdy «QazAqparat» HAA tilshisi.
Osy is Almatyda ótken baspasóz konferentsııasynda jábirlenýshi qylmyskerlerdiń jazaǵa tartylmaı jatqany týraly aıtqannan keıin eldi dúrliktirgen bolatyn. Bas prokýratýra isti dereý óz baqylaýyna aldy. Prokýror eki aıyptalýshyny Qylmystyq kodekstiń úsh baby: 125-baptyń («Adamdy urlaý») 2-bóligi, 121-baptyń («Seksýaldyq sıpattaǵy zorlyq-zombylyq áreketteri») 2-bóligi jáne 120-baptyń («Zorlaý») 2-bóligi boıynsha aıypty dep taýyp, olardyń árbirine 13 jyl bas bostandyǵyn aıyrý jazasyn berýdi surady.
«Úkim oqylatyn kún anyq emes. Sýdıa Marat Bashanov sot tergeýin aıaqtady, sottalýshylar sońǵy sózderin aıtqannan keıin, ol keńes zalynda oqshaý qalady», - dep málimdedi Balqash qalalyq sotynyń keńsesindegiler.
Eske sala keteıik, Nurgúl Qusylbekovanyń polıtsııaǵa aıtýynsha, 2016 jyldyń tamyzynda Balqashtyń eki turǵyny ony molaǵa alyp baryp, kúrekpen urǵan, ony qorlaǵan. Olar qyzdy qabir qazýǵa májbúrlegen. Qylmystyq is birneshe ret toqtatylǵan, aıyptalýshylar ustalmaǵan bolatyn. Polıtsııaǵa shaǵymdanǵany úshin kek alýynan qoryqqan jábirlenýshi Balqashty tastap, Temirtaý qalasynda páter jaldap turǵan.
