Balqashta tokpen zańsyz balyq aýlaǵan eki adam ustaldy
TALDYQORǴAN. QazAqparat - Balqash aýdanynda 2 jergilikti turǵyn ustaldy. Olar elektr toǵyn óndiretin generatordy jáne motorly qaıyqty paıdalana otyryp zańsyz balyq aýlaǵan, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, «Brakoner» is-sharasy barysynda óńirde tabıǵat qorǵaý zańnamasynyń talaptaryn buzýdyń 67 faktisi anyqtaldy, onyń 6 faktisi boıynsha qylmystyq is qozǵaldy. Tekserý barysynda tórt kún ishinde memleketke keltirilgen materıaldyq shyǵyn kólemi 11 mıllıon teńgeden asty.
Vedomstvo taratqan aqparatqa sáıkes, qarasha aıynyń 9-13 kúnderi elimizde «Brakoner» respýblıkalyq jedel aldyn alý is-sharasy uıymdastyryldy. Tártip saqshylary Almaty oblystyq orman sharýashylyǵy jáne janýarlar dúnıesi aýmaqtyq ınspektsııasy, «Ohotzooprom» ÓB» respýblıkalyq kásiporny jáne tabıǵat qorǵaý prokýratýrasymen birlese otyryp óńirde aýqymda reıdter men túsindirý jumystaryn júrgizdi.
«Balqash aýdanynda 2 jergilikti turǵyn ustaldy. Olar elektr toǵyn óndiretin generatordy jáne motorly qaıyqty paıdalana otyryp 151 kg balyqty zańsyz aýlaǵan. ıAǵnı, memleketke 500 myń teńgege jýyq materıaldyq shyǵyn keltirgen. Osy derek boıynsha QR Qylmystyq kodeksti 335-baby boıynsha sotqa deıingi tergeý amaldary júrgizilýde», - dedi oblystyq Tabıǵat qorǵaý polıtsııasy bólimshesiniń bastyǵy Erlan Qýjaqov.
Óz kezeginde, tártip saqshylary zań talaptaryn bilmegendik azamattardy qandaı da bir jaýapkershilikten bosatpaıtynyn eskertedi.
