Balqashta temirjoldan 32 tonna katodty mys urlaǵan qylmystyq top sottaldy

ASTANA. KAZINFORM — Kólik polıtseıleri asa iri kólemdegi urlyqty áshkereledi. 

Kóliktegi polıtsııa departamentiniń krımınaldyq polıtsııa qyzmetkerleri, kólik prokýratýrasynyń úılestirýimen, iri kólemdegi katodty mys urlyǵynyń jolyn kesti.

— Jedel izdestirý is-sharalary barysynda polıtseıler 32 jáne 61 jas aralyǵyndaǵy bes adamnan turatyn topty ustady. Olardyń barlyǵy Balqash qalasynyń turǵyndary. Quqyqqa qaıshy áreketterdiń uıymdastyrýshysy temirjol uıymdarynyń jumysshysy bolyp shyqty.

Tergeý barysynda joǵaryda atalǵan tulǵalardyń Qaraǵandy oblysynyń Toqyraý stantsııasynda Óskemen — Quryq — Port baǵytymen kele jatqan temir jol vagonynan jalpy salmaǵy 32 tonnadan astam katodty mys urlaǵandary anyqtaldy. Keltirilgen materıaldyq shyǵynnyń kólemi 135 mıllıon teńgeden asady, — delingen habarlamada.

Qylmystyq toptyń barlyq múshesi kinási tolyq dáleldendi. Sot úkimimen olardyń árqaısysy 3 jyl 4 aı merzimge bas bostandyǵynan aıyryldy. 

Aıta ketelik Almatyda iri kólemde esirtki tasymaldaǵan top ustalǵan edi.