Balqashta otandyq jáne sheteldik týroperatorlar bas qosty
BALQASh. QazAqparat - Qaraǵandy oblysynyń Balqash qalasynda úlken týrıstik jıyn ótýde. Oblys ákimdigi men kásipkerlik basqarmasy uıymdastyrǵan forýmǵa elimiz óńirlerinen, Reseıdiń Túmen jáne Omby qalalarynan, sondaı-aq Monǵolııadan týroperatorlar keldi, dep habarlaıdy QazAqparat.
Aımaq ákimdiginiń baspasóz qyzmetinen málim etkendeı, týroperatorlar Balqash kýrorttyq aımaǵyndaǵy jaǵajaılyq demalys jaǵdaılarymen tanysady. 14 maýsymda kásipkerler ondaǵan demalys aımaǵyn aralap shyqty.
«Biz usynystar, baǵa jaıly bilemiz, munyń bári bizde bar. Osy forýmǵa demalys oryndaryn óz kózimizben kórip, túmendikterge ózderimizdiń shynaıy sezimderimizdi, áserlerimizdi jetkizý úshin keldik. Qazaqstanda jáne atap aıtqanda, Balqash qalasynda tabıǵat tamasha, demalys oryndary jaıly, jáne de baǵalary da qoljetimdi. Qonaqjaılylyq joǵary deńgeıde, adamdary jaqsy», - deıdi Túmen delegatsııasynyń múshesi Tatıana Semenova.
Qazirgi tańda ózekti máselelerdiń biri kóliktik qatynas bolyp tabylady. Poıyzben jetý úshin týrıster aýysyp otyrýlary tıis bolady. Al avtomobıldik saıahat kóp ýaqytty alady. «Transfer máselesi sheshilse, kóptegen qıyndyqtar joıylyp, reseılik týrıster aǵymy ulǵaıar edi», - deıdi týroperatorlar.
Mońǵolııadan kelgen qonaqtyń aıtýynsha, onyń fırmasynda Altaı men Shyǵys Qazaqstanǵa sheteldik týrısterdi tartý tájirıbesi bar. Endi ol Balqash mańyndaǵy kórinisterge qyzyǵýshylyq tanytyp otyrǵanyn jetkizdi.
Týrıstik forým aıasynda Balqash qalasynda «Densaýlyqqa jol» atty jeńilatletıkalyq marafon jáne kemeler sherýi ótti. Senbi kúni, 15 maýsymda forýmnyń plenarlyq otyrysy ótedi. Onda sala ókilderi otandyq týrızmdi damytý máselelerin talqylaıdy.
