Balqashta órtengen úıden 42 jastaǵy adamnyń máıiti tabyldy
BALQASh. QazAqparat – Senbiden jeksenbige qaraǵan túni Balqash qalasynda barak tıptes úılerdiń birinen órt shyqty. Jalynmen kúres aıaqtalǵan soń órt sóndirýshiler ot sharpyǵan páterden áıel adamnyń máıitin tapty, dep habarlaıdy QazAqparat tilshisi.
2 qazan saǵat 04:40-ta Balqash qalasynyń Rembaza kentindegi úılerdiń birinen órt shyqqany týraly habar kelip tústi.
Baraq úlgisindegi 4 páterli turǵyn úıdiń №2 páterinde jalpy aýdany 30 sharshy metr aǵash eden, jıhaz jáne úı zattary janǵan.
«TJD órt sóndirýshilerdiń kúshimen №1 páterden 1949 jyly týǵan áıel qutqaryldy. №2 páterden órt bolǵan jerden 1979 jyly týǵan (2-toptaǵy múgedek) páterdiń ıesi tabyldy. Qabyldanǵan sharalardyń arqasynda órt 05:31-de sóndirildi. Órttiń sebebi - otty abaısyz qoldaný (sóndirilmegen temeki, sirińke jáne basqa)», - dep málimdedi Qaraǵandy oblysy TJD baspasóz qyzmeti.
Jyl basynan beri otty abaısyz qoldaný sebebinen Qaraǵandy oblysynda 248 órt boldy, onda 22 adam qaza taýyp, 9 adam jaraqat aldy.
Bıylǵy 9 aıda oblysta 772 órt tirkeldi, onda 34 adam qaza tapty, 29 adam jaraqat aldy.
Qaraǵandy oblysy TJ departamenti azamattardan óz qaýipsizdigi máselesine muqııat jáne baıypty qaraýdy suraıdy.
Eger siz belgili bir erejelerdi saqtasańyz, kez kelgen baqytsyzdyqtyń aldyn alýǵa bolady:
- sóndirilmegen temeki men sirińkelerdi qaldyrmaýǵa;
- elektr symdary men aspaptarynyń jaramdylyǵyn qadaǵalaý;
- elektr jelilerin shamadan tys júktemeý;
- tek jaramdy gaz jabdyǵyn paıdalaný.
