Balqashta ortalyqtandyrylǵan jylý boıynsha másele sheshilýde
BALQASh. QazAqparat – Qaraǵandy oblysynyń Balqash qalasynda qurylysshylar jańa jylý qubyryn tóseýge kiristi, dep habarlaıdy QazAqparat tilshisi.
Magıstraldi jeli Jylý elektr ortalyǵynan «Qońyrat» shaǵyn aýdanyna deıin ótedi. Bul turǵyndardyń kóp jylǵy problemasyn sheshýge múmkindik beredi. 170-ten astam úı sapaly jylýmen qamtylatyn bolady.
Joba eki jylǵa eseptelgen. Alaıda, merdiger uıym nysandy 2020 jyldyń sońyna qaraı tapsyrýǵa ýáde berip otyr. Qurylys aıaqtalǵannan keıin ortalyq jylytý júıesine Jumysshy kenti, 64-shi oram jáne ishinara Balqash stantsııasy qosyla alady.
Merdiger uıymnyń dırektory Aram Hachatrıannyń aıtýynsha, osy aptada qubyrlar jetkiziledi. Barlyq qajetti materıaldar jergilikti bazada jasalady.
«Bizde jylý qýaty jetkilikti. Tutynýshylardy tıisti jylýmen qamtamasyz etemiz», - deıdi Balqash JEO dırektory Nıkolaı Ijık.
Qazirgi ýaqytta magıstraldi jeli qurylysyna 50-ge jýyq adam jumysqa ornalastyryldy. Mamandardy qabyldaý jalǵasýda.
