Balqashta názik jandy áskerı qyzmetshi joıǵysh ushaqty tizgindegen

ASTANA. QazAqparat - QR Qarýly Kúshteri  áskerı áýe kúshterine qarasty 53898 áskerı bólimindegi aǵa ushqysh ári nusqaýshy leıtenant Ardana Botaı óziniń áskerı qyzmetin abyroımen atqaryp keledi, dep habarlaıdy «QazAqparat» HAA tilshisi.

Ardana Botaı bala kezinen ushqysh bolýdy armandap, joıǵysh ushaqty tizgindeýdi maqsat etipti. Osy arman on alty jastaǵy boıjetkendi memlekettik avıatsııalyq ortalyqqa jetelep kelgen. Ortalyqta úzdikterdiń biri bolǵan kýrsant TL-2000, Diamond-42 jáne Techam-P 2002 sekildi jeńil motorly ushaqtardy júrgizýdi úırenedi. Joǵary ushqysh mamandyǵyn ol Qazaqstan Respýblıkasynyń Azamattyq avıatsııa akademııasynda alǵan.

Oqý aıaqtalysymen Ardana 2010 jyldyń qańtar aıynan bastap An-26 áskerı-kóliktik ushaq ekıpajy komandıriniń kómekshisi bolyp qyzmetke keledi. Qazirgi ýaqytta Balqash qalasyndaǵy 53898 áskerı bóliminde áskerı qyzmetin ótep júr.

«Qus sekildi samǵap júrip, kók aspanǵa ǵashyq bolmaý múmkin emes. Bala kezden ushýdy armandaıtyn edim. Kishkene kezimde ákem ekeýmizdiń Almatyǵa ushyp barǵanymyz esimde. Sol kezdiń ózinde men pılottyń eń basty mindeti - kez kelgen jaǵdaıda durys sheshim qabyldaý ekenin sezindim. Ushqyshtar - áýedegi qorǵaýshylar emes pe!?», - deıdi Ardana Botaı.

Aıta keterligi, Qazaqstannyń áskerı áýe kúshterinde Ardana L-39 ushaǵyn tizgindegen tuńǵysh áıel. Áskerı qyzmetshi qazirgi tańda óziniń kásibı biliktiligin jetildirý ústinde.