Balqashta lańkestik jasamaqshy bolǵan bes kúdikti tutqyndaldy

QARAǴANDY. QazAqparat - Qaraǵandy oblysy Balqash qalasynda terrorlyq top qurdy degen kúdikpen bes er adam eki aıǵa tutqyndaldy. Bul týraly oblystyq sottyń baspsóz qyzmeti habarlady.

«29 maýsymda Balqash qalalyq soty  QR QK 257-baby 1-bólimi, 287-baby 5-bóligi boıynsha qylmys jasaǵan Ý.D.D., Ý.K.D., Ý.E.D., A.B.D. jáne  K.N.M. syndy kúdikti tulǵalarǵa qatysty eki aıǵa qamaýǵa alý túrinde bultartpaý sharasyn sanktsııalaý týraly 5 materıaldy qarady», - delingen habarlamada. 

Sot sanktsııasymen bes kúdikti eki aıǵa qamaýǵa alyndy. Oblystyq sottyń aqparatyna sáıkes olar 26-37 jas aralyǵyndaǵy Qaraǵandy oblysynyń týmalary, buryn sottalǵandar.

«2016 jylǵy sáýirde dástúrli emes aǵymdaǵy dindi ustanatyn Balqash turǵyny Ý.K.B. qalada lańkestik top qurady, olar  Balqash qalasy men Gúlshat kentiniń turǵyndary.   Olardyń maqsaty qoldan jarylǵysh zat jasap, Qazaqstanda terrorlyq akti jasaý, elde qyzmetine tyıym salynǵan «DAISh» halyqaralyq lańkestik tobyna járdemdesý», - dep túsindirdi oblystyq sot baspasóz qyzmetinde.

Tergeý nusqasy boıynsha topty 36 jastaǵy Balqash turǵyny basqarǵan. «Bul rette ár qatysýshyǵa ról berilgen, jarylǵysh zat izdeý, ony qoldan daıyndaý, avtokólik pen aqshany qylmystyq qajettilikke paıdalaný, lańkestik jasaý ornyn izdeý», - delingen habarlamada.

Lańkestik top músheleri jarylǵysh zatty zańsyz ıelenip, Gúlshat aýylynda saqtaǵan. Oq-dárini qaıdan alǵany ázirge belgisiz. Ony tergeý anyqtaıdy.

 «26 maýsymda saǵat 21.10-da Gúlshat kentinde top qatysýshylarynyń biri jarylǵysh zatpen óz-ózin jaryp jiberdi», - dep qosty sot baspasóz qyzmeti.

Buryn habarlanǵandaı, Balqash qalasy men Gúlshat kentinde jarylys jasamaqshy bolǵan radıkaldyq top qyzmetiniń joly kesildi.

Ustaý kezinde bir lańkes ózin-ózi jaryp jiberdi. Basqa qurbandar men zardap shekkender joq.

Qalǵan top músheleri ustaldy. Zattaı aıǵaqtar, qarý tárkilendi. Sot aldy tergeý júrgizilýde.