Balqashta koronavırýstan jazylǵan naýqastardy ońaltatyn ortalyq ashyldy
BALQASh. QazAqparat – Naýryz merekesine oraı Balqashta alǵashqy ońaltý ortalyǵy iske qosyldy. Mekeme qyzmetterdiń keń spektrin usynady. Joba Qaraǵandy oblysynyń densaýlyq saqtaý basqarmasy men «Balqash medıtsına ortalyǵy» JShS arasynda memlekettik-jekemenshik áriptestik aıasynda júzege asyryldy, dep habarlaıdy QazAqparat.
Medıtsınalyq mekemede ortalyq jáne perıferııalyq júıke júıesi, qan aınalymy júıesi aýrýlaryna baılanysty qozǵalý buzylysy bar, jaraqattan, júrekke, mıǵa jáne býyndarǵa operatsııa jasalǵannan keıingi eresek patsıentter emdeledi. Munda olar kınezo-, mehano - jáne ergoterapııa, dári-dármekpen emdeý jáne basqa em alady.
Ortalyqta aı saıyn 80-nen astam adam ońaltýdan ótedi. Patsıentterdi jaqyn mańdaǵy eldi mekenderden - Prıozersk, Aqtoǵaı jáne Shet aýdandarynan da qabyldaıdy.
Ońaltý ortalyǵy aýdany 1 700 sharshy metr úsh qabatty ǵımaratta ornalasqan.
Birinshi qabatta tirkeý orny men lıft, ekinshi qabatta - ońaltý terapııasynan ótýge arnalǵan medıtsınalyq jabdyqtary bar zaldar, úshinshi qabatta - emshara kabınetteri men táýlik boıy qalýǵa arnalǵan palatalar ornalasqan.
Ortalyq zamanaýı medıtsınalyq jáne tehnologııalyq jabdyqtarmen jabdyqtalǵan.
Shtatta 6 dáriger jáne 14 orta medıtsınalyq qyzmetker bar.
Buǵan deıin jyl saıyn 700-ge jýyq balqashtyq oblystyq klınıkalarǵa ońaltýǵa jiberiletin. Endi kómektiń bul túri qalanyń ózinde qoljetimdi.
Sondaı-aq, naýryz aıynyń aldynda Balqashta juqpaly aýrýlar aýrýhanasynyń korpýsy iske qosyldy, onda KVI-men aýyratyn naýqastar emdeledi.
Tórt qabatty ǵımaratty kúrdeli jóndeý 2021 jyldyń aqpan aıynyń sońynda aıaqtaldy. Buǵan deıin korpýs tórt jyl boıy tek jartylaı ǵana paıdalanylǵan.
Qazir bul - 100 tósekke arnalǵan tolyqqandy tıptik juqpaly aýrýlar aýrýhanasy.
Ǵımarattyń birinshi qabatynda qabyldaý-dıagnostıkalyq bólimsheler, jeke kiretin esigi jáne bólek sorý-syrtqa taratý jeldetkishi bar alty boks, rentgen-kabınet ornalasqan.
Ekinshisinde – anestezıologııa jáne jansaqtaý bólimi jáne taǵy alty boks bar.
Ǵımarattyń úshinshi jáne tórtinshi qabattarynda operatsııalyq blok, perzenthana, palatalary bar bólimsheler ashylǵan.
Sondaı-aq, medıtsınalyq mekemeniń quramynda óziniń bakterıologııalyq zerthanasy jumys isteıdi.
Aýrýhana balalar men eresekterge mamandandyrylǵan kómek kórsetý úshin qajetti zamanaýı medıtsınalyq jáne tehnologııalyq jabdyqtarmen jabdyqtalǵan.
Qazirgi jaǵdaıda medıtsınalyq mekeme tek koronavırýspen aýyratyn naýqastardy qabyldaıdy.
Pandemııa aıaqtalǵannan keıin ınfektsııanyń kez kelgen túrin emdeýge arnalǵan statsıonar retinde jumys isteıdi.
