Balqashta kópqabatty turǵyn úıdiń kireberisi opyryldy
BALQASh. KAZINFORM – 19 aqpan kúni tańerteń Balqash qalasynda Qaramende bı kóshesi, 10 mekenjaıynda ornalasqan kópqabatty turǵyn úıdiń besinshi kireberisi ishinara opyryldy. Zardap shekkender joq. Atalǵan kireberis buǵan deıin apatty dep tanylyp, tolyqtaı bosatylǵan.
Oqıǵa shamamen saǵat 08:10-da tirkelgen. Atalmysh kireberistegi páterlerle eshkim turmaǵan. Ol buǵan deıin resmı túrde apatty dep tanylyp, buzýǵa daıyndalǵan.
Balqash qalasynyń ákimdigi oqıǵa kezinde turǵyndar úshin eshqandaı qaýip bolmaǵanyn málimdedi.
– Besinshi kireberis 2025 jyly Qazaqstan Respýblıkasynyń zańnamasyna sáıkes júrgizilgen tehnıkalyq qorytyndy men qurylys saraptamasynyń negizinde apatty dep tanyldy. Turǵyndar aldyn ala kóshirildi, páterler turýǵa jaramsyz dep tanyldy, - dep habarlady Balqash qalasynyń ákimdigi.
Qalalyq bıliktiń málimetinshe, opyrylý sátinde kireberis ishinde eshkim bolmaǵan. Qaza tapqandar men zardap shekkender joq. Ǵımarat aýmaǵy qorshalyp, apatty bólikke kirý shektelgen. Injenerlik jeliler: elektrmen, jylýmen jáne sýmen jabdyqtaý belgilengen tártipke sáıkes ajyratylǵan.
Qazirgi ýaqytta nysanda besinshi kireberisti buzý jumystary júrgizilýde. Jumystar qurylys jáne ónerkásiptik qaýipsizdik talaptaryn qatań saqtaı otyryp atqarylyp keledi.
– Buzý jumystary aıaqtalǵannan keıin qalǵan tórt kireberis boıynsha qosymsha tehnıkalyq tekserý men qurylys saraptamasy júrgiziledi. Odan keıin olardyń konstrýktsııalaryn kúsheıtý úshin jobalyq-smetalyq qujattama ázirleý josparlanyp otyr, - dep naqtylady Balqash qalasynyń ákimdigi.
Úıdi odan ári paıdalaný jónindegi túpkilikti sheshim saraptama qorytyndylary alynǵannan keıin qabyldanyp, qosymsha habarlanatyn bolady.
Osyǵan deıin Oral qalasynda apatty úıi súrilgen turǵyndardyń baspana ala almaı otyrǵany habarlanǵan bolatyn.