Balqashta kolledjder kópbalaly otbasy balalaryna tıisti tólemaqysyn bermeı kelgen
BALQASh. KAZINFORM — Balqash qalasynyń prokýratýrasy kópbalaly otbasynan shyqqan stýdentterge jáne basqa qalalardan kelgen stýdentterge ótemaqy tóleýde zańbuzýshylyqtar bolǵanyn anyqtady.
Tekserý barysynda Balqash qalasynyń prokýratýrasy eki kolledj kópbalaly otbasynan shyqqan stýdentterge tıisti ótemaqy bermegenin anyqtady.
Zańǵa sáıkes memlekettik tapsyrys boıynsha oqıtyn kóp balaly otbasynan shyqqan stýdentter, jan basyna shaqqandaǵy ortasha tabysy memleket belgilegen deńgeıden aspasa, tegin ystyq tamaqpen qamtamasyz etilýge quqyly.
Ystyq tamaq berilmegen jaǵdaıda kolledjder stýdentterge bilim basqarmasy belgilegen tamaq quny kóleminde ótemaqy tóleýge mindetti.
Qabyldanǵan qadaǵalaý sharalarynyń nátıjesinde kópbalaly otbasynan shyqqan stýdentterge jalpy somasy 4,7 mln teńge ótemaqy aýdaryldy.
Memlekettik krıterııge sáıkes keletin barlyq stýdentterge tıisti tólemaqy budan ári turaqty negizde aýdarylady.
Sonymen qatar, basqa jerde turatyn, alaıda Balqash qalasyndaǵy kolledjde oqıtyn stýdentterdiń qysqy jáne jazǵy demalys kezindegi jolaqy ótelýi kerek.
Tekserý barysynda kolledjderdiń basqa jerde turatyn stýdentterge qysqy kezeńde qajetti ótemaqy tólemegeni anyqtaldy.
Prokýrorlyq qadaǵalaý nátıjesi boıynsha bir mıllıon teńgeden astam tólem tolyǵymen aýdaryldy.
