Balqashta «Kıberpol» arnaıy bólimshesi iske qosyldy

BALQASh. QazAqparat – Balqashta ınternettegi alaıaqtarmen jáne kıberqylmyspen kúres kúsheıtiledi. Qalalyq polıtsııa bóliminde «Kıberpol» arnaıy bólimshesi quryldy, dep habarlaıdy QazAqparat tilshisi.

Jańa bólim zamanaýı zerthanamen jabdyqtalǵan jáne biryńǵaı tereze qaǵıdaty boıynsha jumys isteıdi. Zardap shekkenderdiń ótinishteri dereý tergeýshilerge túsedi, olar is júrgizedi.

«Oblystyq polıtsııa departamentinde kıberqylmysqa qarsy kúres bólimshesi jumys isteıdi. Balqash PB-de kıberqylmyspen kúres jónindegi top ta jumys isteı bastaıdy. Oǵan jedel ýákilder, tergeýshiler, sondaı-aq IT mamandar kiredi. Toptyń mindeti – ınternet-alaıaqtyq týraly barlyq habarlamalarǵa dereý jaýap berý, qylmystyń osy túrin sapaly tergeý jáne ashý», - deıdi Qaraǵandy oblysy PD bastyǵynyń orynbasary Ábil Ábildın.

Buǵan deıin Qaraǵandy oblysynyń polıtsııa departamentinde kıberqylmyspen kúres jónindegi jańa bólim tanystyryldy. Onyń quramyna tájirıbeli tergeýshiler, jedel ýákilder men krımınalıster kiredi. Sondaı-aq, kıberkeńistiktegi qylmystardy ashýǵa jetekshi IT kompanııalardyń biriniń mamandary men B. Beısenov atyndaǵy ІІM Qaraǵandy akademııasynyń qyzmetkerleri tartyldy.