Balqashta habar-osharsyz ketken 19 jastaǵy boıjetkenniń denesi tabyldy
BALQASh. QazAqparat - Іz-túzsiz joǵalǵan 19 jastaǵy boıjetkenniń denesi tabyldy, dep habarlaıdy QazAqparat.
Qyzdy izdeý jumystary 2 qarashada bastalǵan bolatyn. Boıjetken sol kúni úıden shyǵyp ketip, qaıtyp oralmaǵan. Anasy shuǵyl polıtsııaǵa habar bergen.
Polıtsııa men joǵalǵandardy izdeıtin volonterler qozǵalysy birden iske kiristi.
«2 qarashada Balqash qalasy polıtsııasynyń kezekshi bólimine 55 jastaǵy qala turǵynynan ótinish tústi. Ol 19 jastaǵy qyzynyń habar-osharsyz ketkenin málim etken. Bul fakti tirkelip, polıtsııanyń búkil jeke quramy boıjetkendi izdeýge jumyldyryldy» delingen Qaraǵandy oblystyq polıtsııa departamenti taratqan málimette.
Búgin, 3 qarasha kúni izdeý jumystary kezinde Balqash kóline jaqyn mańnan 19 jastaǵy qyzdyń denesi tabyldy.
Máıitte kózge kórinetin azaptaý belgileri baıqalmaıdy. Qyzdyń óliminiń aldyn ala sebebi - aǵzanyń aıazǵa úsýi.
«Atalǵan jaǵdaı negizinde búkil saraptama taǵaıyndaldy, ólim sebebi anyqtalyp jatyr» dep túıindedi departamenttiń baspasóz qyzmetinen.
