Balqashta «Eńbek joly» baıqaýynyń jeńimpazdary marapattaldy
ASTANA. QazAqparat - Balqashta qalanyń 80 jyldyǵyna arnalǵan «Eńbek joly» baıqaýynyń qorytyndysy shyǵaryldy. Sharanyń maqsaty - jalpyǵa ortaq eńbek qoǵamy ıdeıasyn alǵa jyljytý. Marapattaý saltanaty M. Hamzın atyndaǵy Metallýrgter mádenıet saraıynda ótti, dep habarlaıdy oblystyq ákimdiktiń baspasóz qyzmeti.
Baıqaý úsh nomınatsııa boıynsha ótti: «Úzdik eńbek áýleti», «Jumys isteýshi jastardyń úzdik tálimgeri» jáne «Kásiporynnyń úzdik jas jumyskeri».
Bul ataqqa qalanyń 8 kásiporyn men uıymdarynan jınalǵan 38 úmitker baq synady. Jeńimpazdardy qala turǵyndary ózderi ákimdik saıtynda ótkizilgen onlaın-daýys berý arqyly anyqtady.
«Eń úzdiń eńbek áýleti» nomınatsııasynda birinshi oryndy jalpy jumys ótilderi 104 jyldy quraǵan Kerimbaevtar áýleti jeńip aldy. Áýlet basshysy Qanat Kerimbaev «Qazaqmys Smeltıng» JShS Balqash jóndeý-mehanıka arnaıy basqarmasynda dánekerleýshi-jóndeýshi qyzmetin atqarady. Osy kásiporynda onyń tórt aǵasy, uly jáne nemere inisi jumys isteıdi. Olardyń ákesi men atasy Dáýken Qaýanuly 25 jyl boıy mys balqytý tsehynda balqytýshy-júkteýshi bolyp istegen.
Ekinshi orynda - Dıdıkter áýleti. Olardyń jalpy jumys ótili - 118 jyl. Úshinshi oryn Ybyraevtar áýletine buıyrdy - qyzy men anasy jalpy eseptegende «Qazaqmys Smeltıng» JShS-de 71 jyl qyzmet atqarǵan eken.
Jumys isteýshi jastardyń úzdik tálimgeri «TTMÓZ» AQ ortalyqtandyrylǵan jóndeý tsehynyń tokari Valentına Mozal dep tanyldy. Ol 50 jyldan astam óziniń súıikti isine adal bolǵan. Zeınette bola tura, jumysyn jalǵastyryp, jastarǵa bar bilgenin úıretýden jalyǵar emes.
Bul nomınatsııada ekinshi oryn «Qazaqstan Temir joly» Ulttyq kompanııasy» AQ fılıalynyń Balqash dıstantsııasy jáne baılanysynyń eńbekti qorǵaý jáne qaýipsizdik tehnıkasy boıynsha jetekshi ınjeneri Azamat Yqylasbekovke buıyrdy.
Úshinshi orynda - «Qazaqmys Smeltıng» JShS bloktardyń aýa taratqyshynyń apparatchıgi Amangeldi Jaqypbekov.
«Kásiporynnyń úzdik jas jumyskeri» nomınatsııasynda «Qazaqstan Temir joly» Ulttyq kompanııasy» AQ fılıalynyń Balqash dıstantsııasy jáne baılanysynyń óndiristik oqý sheberi - 27 jasar Oljas Ermaǵambetov jeńimpaz atandy. Jasyna jáne az jumys ótiline qaramastan ol tehnıkalyq protsessinde ózin jaqsy uıymdastyrýshy jáne ónertapqysh retinde kórsete bilgen.
Ekinshi oryndy Andreı Golovatovqa berdi. Ol da osy fılıalda Balqash paıdalaný lokomotıv deposynyń ınjener-tehnology qyzmetinde isteıdi.
Úshinshi orynda - «Qazaqmys Smeltıng» JShS mys jáne emal symdar óndirý tsehiniń ótinimderdi quraý boıynsha mamany Olga Levchenko boldy.
Laýreattarǵa dıplomdar men baǵaly syılyqtar tabys etildi.
