Balqashta eks-polıtseıge burynǵy áıelin uryp-soqty degen kúdik keltirilip otyr

QARAǴANDY. KAZINFORM - Balqash qalasynda burynǵy polıtsııa qyzmetkeriniń eks-jubaıyna kúsh qoldanǵany týraly oqıǵa qoǵamda alańdaýshylyq týǵyzdy. Oqıǵa áleýmettik jeli arqyly jarııa bolǵannan keıin kópshiliktiń nazaryn aýdardy.

 

Oqıǵa jábirlenýshiniń týysy áleýmettik jelide jarııalaǵan jazbadan keıin belgili boldy. Onda 4 mamyr kúni tańǵy saǵat 4:00-der shamasynda er adamnyń burynǵy áıeliniń úıine kirip, uryp-soǵyp, tunshyqtyrǵany baıandalady.

«Ol úıge basa-kóktep kirip, ápkemdi tunshyqtyryp, aýyr soqqyǵa jyqty. Denesine kóptegen jaraqat keltirip, ómirine qaýip tóndirdi. Qazir ol aýrýhanada em qabyldap jatyr. Soǵan qaramastan, kúdikti medıtsınalyq mekemege esh kedergisiz kirip, qorqytyp júr. Búginge deıin bostandyqta», – delingen jábirlenýshiniń ápkesi jarııalaǵan Instagram paraqshadaǵy jazbada.

Jaqyndarynyń aıtýynsha, jábirlenýshi oqıǵadan keıin eki saǵat ótkende – 4 mamyr kúni tańǵy 6-da polıtsııaǵa resmı aryz bergen. Alaıda týystarynyń sózinshe, jaǵdaı áli kúnge deıin óziniń zańdy baǵasyn alǵan joq. Olar oqıǵa jarııalanbasa, ádildikke qol jetkizý qıyn bolady dep esepteıdi.

Atalǵan derek boıynsha Qaraǵandy oblysy Polıtsııa departamenti qylmystyq is qozǵalǵanyn rastady.

«Balqash turǵyny burynǵy kúıeýinen taıaq jegeni týraly shaǵym túsirdi. Bul fakti boıynsha Qylmystyq kodekstiń tıisti babymen is tirkeldi. Kúdikti – burynǵy polıtsııa qyzmetkeri – anyqtalyp, polıtsııa bólimine jetkizildi», – dep málimdedi vedomstvo ókilderi.

Polıtsııanyń habarlaýynsha, janjal múlikke qatysty daý saldarynan týyndaǵan bolýy múmkin. Jábirlenýshi taraptyń 4 maýsymda resmı aryz jazǵany naqtylandy. Qazirgi tańda sotqa deıingi tergeý amaldary júrgizilip jatyr. Tergeý sheńberinde oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan sharalar qolǵa alynǵan.

«Zań bárine ortaq. Eshkimniń qyzmettegi laýazymy da, jeke baılanystary da jaýapkershilikten jaltarýǵa negiz bola almaıdy. Bul is Qaraǵandy oblysy Polıtsııa departamenti basshylyǵynyń erekshe baqylaýynda», – dedi departamenttiń resmı ókili Baqytjan Qudııarov.

Osyǵan deıin Túrkistan oblysynda birden 28 polıtseı jazalanǵanyn habarlaǵan bolatynbyz.