Balqashta eki birdeı jasóspirim qyz zorlyq-zombylyq pen bopsalaýǵa ushyraǵan
BALQASh. KAZINFORM – Balqashta 13 jáne 15 jastaǵy kámeletke tolmaǵan eki qyzǵa qatysty qylmystyq is tergelip jatyr. Jábirlenýshilerdiń jaqyndarynyń taratqan málimetine qaraǵanda, jasóspirimder jynystyq zorlyq-zombylyqqa ushyrap, qorqytý men beınejazbalar arqyly bopsalaýdyń qurbany bolǵan.
Týystarynyń aıtýynsha, oqıǵa jaz mezgilinde bastalǵan. Sol ýaqytta apaly-sińlili qyzdar ózderinen jasy úlken boıjetkenmen tanysqan. Ol jasóspirimdermen jaqyn aralasyp, birtindep senimderine kirgen. Dámhanaǵa shaqyryp, syılyqtar berip, osylaısha olardyń kóńilin aýlaǵan.
Arada biraz ýaqyt ótken soń ol qyzdardy úıine deıin jetkizip salýdy usynǵan. Alaıda kólikte odan bólek birneshe jigit bolǵan. Týystarynyń málimetinshe, jol ústinde jasóspirimder jynystyq zorlyq-zombylyqqa ushyrap, bolǵan oqıǵa beınejazbaǵa túsirilgen. Keıin sol jazbalardy jarııalaımyz dep qorqytyp, qyzdarǵa qysym kórsetken.
Jaqyndarynyń aıtýynsha, ýaqyt óte kele qorqytý men bopsalaý jasóspirimderdi erkinen tys áreketterge májbúrleý quralyna aınalǵan. Ákesi túngi aýysymǵa jumysqa ketken kezde qyzdardy úıden shyǵýǵa, er adamdarmen kezdesýge májbúrlegen.
Buǵan qosa, otbasy músheleri jasóspirimderge kúsh qoldanylǵanyn aıtady. Olardyń sózinshe, qyzdardy uryp-soǵyp, denelerine jaraqat salǵan, qoldaryn temekimen kúıdirgen. Bul málimetter tergeý barysynda tekserilip, taǵaıyndalǵan saraptamalar nátıjesinde tıisti quqyqtyq baǵa berilýge tıis.
Oqıǵanyń beti qyzdardyń aǵasy olardyń biriniń uıaly telefonynan qorqytý sıpatyndaǵy hat-habarlardy baıqap qalǵannan keıin ashylǵan. Osydan soń qyzdaryn jalǵyz ózi tárbıelep otyrǵan ákesi polıtsııaǵa aryz túsirgen.
Qaraǵandy oblysynyń Polıtsııa departamenti atalǵan derek boıynsha qylmystyq is qozǵalyp, kúdiktilerdiń ustalǵanyn rastady.
– 16 qarashada Balqash qalasynyń 55 jastaǵy turǵyny qyzdaryna qatysty quqyqqa qaıshy áreketter jasalǵany týraly aryzben polıtsııaǵa júgindi. Atalǵan derek boıynsha qylmystyq is qozǵaldy. Jedel-izdestirý is-sharalarynyń nátıjesinde polıtseıler kúdiktilerdi anyqtap, ustady. Quqyqqa qaıshy áreketterdiń ártúrli ýaqytta jáne ártúrli jerlerde jasalǵany anyqtaldy. Ustalǵandardyń barlyǵy ýaqytsha ustaý ızolıatoryna qamaldy, - dep habarlady vedomstvo ókilderi.
Qazirgi ýaqytta tergeý jumystaryna oblystyq polıtsııa departamentiniń tájirıbeli qyzmetkerleri tartylǵan. Sotqa deıingi tergep-tekserý barysy departament basshylyǵynyń erekshe baqylaýynda.
Quqyq qorǵaý organdary tergeý múddesine baılanysty istiń ózge de jaı-japsaryn jarııa etpeı otyr. Polıtsııa málimetinshe, Qazaqstan Respýblıkasy Qylmystyq-protsestik kodeksiniń 201-babyna sáıkes, sotqa deıingi tergep-tekserý derekteri jarııa etýge jatpaıdy.
Qazir tergeý amaldary jalǵasyp jatyr. Іs boıynsha birqatar saraptama taǵaıyndalǵan.
Buǵan deıin Qaraǵandy oblysynyń qylmystyq ister jónindegi mamandandyrylǵan aýdanaralyq soty kámeletke tolmaǵan qyzdy zorlaý isi boıynsha bes jasóspirimge úkim shyǵaryp, olardyń árqaısysy 5 jyl 7 aı 15 kúnge bas bostandyǵynan aıyrylǵanyn habarlaǵan bolatynbyz.