Balqashta buzaqylar mashınalardyń ballonyn jaryp júr
QARAǴANDY. QazAqparat - Balqash yqshamaýdandarynyń birinde birneshe ondaǵan avtomobıldiń dońǵalaǵyna belgisiz buzaqylar zııan keltirgen, dep habarlaıdy «QazAqparat» HAA tilshisi.
Ballony tesilgen mashınalardyń naqty sanyn polıtsııa anyqtap jatyr. Mashınasynyń júrýge jaramsyz bolyp qalǵanyn kólik ıeleri 21 qańtar kúni tańerteń bilgen. Avtomobılderdiń keıbiriniń bir nemese eki dońǵalaǵy zaqymdanǵan, al keıbiriniń tórt ballony da tesilgen.
Kólik ıeleri túrli pikirler aıtyp jatyr. Bireý dońǵalaq jóndeý salondaryna klıent tartý maqsatynda jasalǵan dese, endi bireýler erikken buzaqylyq áreket dep baǵalap otyr.
Polıtsııa qylmyskerlerdi izdep jatyr. QR QK 293-baby («Buzaqylyq») boıynsha sotqa deıingi tergep-tekserý júrgizilýde.
