Balqashta bıyl 100-ge jýyq otbasy baspanaly bolady
QARAǴANDY. QazAqparat - 2018 jyly Qaraǵandy oblysy Balqash qalasynda «Nurly jer» memlekettik baǵdarlamasyn júzege asyrý aıasynda 45 páterli eki turǵyn úı paıdalanýǵa beriledi, dep habarlady QazAqparat tilshisi.
«Memlekettik turǵyn úı qorynan baspana alý úshin kezekte 1022 adam tur. Olardy pátermen qamtamasyz etý úshin 43 myń sharshy metr baspana turǵyzý qajet. Aǵymdaǵy jyly Qońyrat móltekaýdanyndaǵy 48 páterli eki turǵyn - úı Zaıtsev kóshesi 18 "a" jáne Rýsakov kóshesi 10-ynshy úılerde jalpy aýmaǵy 4 myń 200 sharshy metr alań qaıta qalpyna keltiriledi» - dedi Balqash qalasynyń ákimi Aleksandr Aglıýlın.
Onyń aıtýynsha, ótken jyly baspana kezeginde turǵandar úshin 60 páterli turǵyn úı, sondaı-aq qala kásipkerleriniń jeke ınvestıtsııalary esebinen qaıta jóndelgen Seıfýllın kóshesindegi 27 páterli úı paıdalanýǵa berildi.
Balqashtyqtar sondaı-aq turǵyn úı jınaǵy júıesine de belsendi qatysýda. Búginde Balqashtyń 3500 turǵyny «Turǵyn úı qurylys jınaq bankinde» shot ashqan. Bıylǵy jyly olarǵa «Nurly jer» baǵdarlamasy aıasynda jaılylyq deńgeıi úshinshi sanattaǵy 45 páterli eki úı paıdalanýǵa berilmek.
Aleksandr Aglıýlınniń málimdeýinshe, 2017-2020 jyldarǵa deıin óńirdi damytý baǵdarlamasy aıasynda qalada 5885 sharshy metr úı tapsyrylady. Osyǵan oraı 2019 jyly kezekte turǵandar úshin jaldamaly 45 páterli eki turǵyn úıdiń qurylysy josparǵa alyndy, jobalaý-smetalyq qujattar qolǵa alyndy.
Sonymen qatar, 2017 jyly bıýdjetti oryndaý qorytyndysy boıynsha turǵyn úı-kommýnaldyq jáne qalanyń áleýmettik máselelerin sheshý úshin 600 mln teńge baǵyttalǵan bolatyn. Osyǵan oraı áleýmettik salanyń barlyq jekelegen shyǵyny 2018 jyly bıýdjettiń ortaq kólemine sáıkes 55 paıyzdy qurady, bul 5 mlrd teńge shamasynda.
