Balqashta betonnyń oıyǵyna qysylyp qalǵan bala qutqaryldy
QARAǴANDY. QazAqparat - Qaraǵandy oblysynyń qutqarýshylary temirbetonnyń oıyǵyna qysylyp qalǵan 5 jasar balany alyp shyqty, dep habarlaıdy QazAqparat tilshisi oblystyq TJD baspasóz qyzmetine silteme jasap.
Óńirdiń TJD málimetterine sensek, 15 qyrkúıek kúni Balqash qalasynyń Eski alań kentinde turǵyn úı mańynda oınap júrip, dıametri 300 mıllımetrlik temirbetonnyń oıyǵyna qysylyp qalǵan 5 jasar bala qutqaryldy.
Dál osyndaı jaǵdaı Buqar jyraý aýdanynyń Botaqara aýylynda da tirkelgen. TJD qutqarýshylary qoly janarmaı bagyna qystyrylyp qalǵan KamAZ júrgizýshisin qutqaryp qaldy.
2018 jyldyń basynan beri Qaraǵandy oblysy TJD qutqarý bólimsheleri 580-den astam ártúrli apattyq-qutqarý jumystaryn atqaryp, 608 adamdy aman alyp qalǵan.
