Balqashta «Balapan» baǵdarlamasy boıynsha jańa balabaqsha ashyldy
NUR-SULTAN. QazAqparat - Balqash qalasynda «Altyn saqa» jeke menshik balabaqshasy ashyldy. Ata-analar oǵan sábıin qoljetimdi baǵamen ornalastyra alady, dep habarlaıdy qalalyq ákimdiktiń baspasóz qyzmeti.
Mektepke deıingi mekeme memlekettik-jekeshelik áriptestikti damytýdy qarastyratyn «Balapan» baǵdarlamasyna endi.
- Bul qaladaǵy ekinshi jekemenshik balabaqsha. Ótken jyly 40 oryndyq «Balapan» balabaqshasy ashyldy. Búgin 40 balany qabyldaıtyn «Altyn saqa» balabaqshasy óz esigin aıqara ashty. Biz onda memlekettik tapsyrysty ornalastyramyz jáne bıýdjetten shyǵystardyń bir bóligin óteıtin bolamyz. Nátıjesinde ata - analar aıyna bir balaǵa 10356 teńge tóleıtin bolady, - dedi qala ákiminiń orynbasary Saıagúl Jaqsylyqova.
Ol qalada jańa balabaqshalar tapshy ekenin jáne osy máseleni sheshý úshin «Balapan» baǵdarlamasy ázirlengenin atap ótti.
Jeke kásipker Aqbota Omarbekova balany balabaqshaǵa ornalastyrý kezindegi qıyndyqtarǵa tap bolǵanyn aıtty. Osydan keıin, memlekettik-jeke menshik áriptestik sharttaryn zerdelep, áleýmettik jobaǵa kirisken.
Jańa bala baqshany jaılastyrýǵa kásipker úsh aı ýaqyt jumsaǵan eken. Onyń aıtýynsha, jabdyqtaýǵa 30 mln teńge jumsaǵan, alaıda ýaqyt óte kele shyǵyndary óteletinine senimdi.
Osy jobanyń arqasynda balqashtyqtar úshin jańa jumys oryndary paıda boldy. Eki qyzmetker jumyspen qamtý ortalyǵy arqyly jumysqa ornalasty.
Balabaqshada aǵylshyn tili úıirmesi bar. Sondaı-aq balalarmen logoped jáne horeograf aınalysady. Bolashaqta qyzmetterdi keńeıtý jáne oryndar sanyn arttyrý josparlanýda.
