Balqashta «Asyqtar» músini paıda boldy
QARAǴANDY. QazAqparat - Balqash qalasynda jańa kórnekti oryn paıda boldy. M. Hamzın atyndaǵy Mádenıet saraıynyń janynda «Asyqtar» skýlptýralyq týyndysy ornatyldy, dep habarlaıdy QazAqparat tilshisi.
Іri kólemdi bes asyq shyny talshyqtan jasalǵan. Árqaısysynyń salmaǵy - 30 keli, uzyndyǵy - 1,5 metr. Asyqtar jerge tastalý kezegimen jasalǵan. Aldymen alshy, artynan táıke, odan keıin shik ornatylǵan.
Alshy - asyqtyń ıirilgende tegis tabany jerge tıip, turyq túsýi. Oıyn kezinde oǵan birinshi dárejeli mán beriledi. Táıke - asyqtyń ıirilgende shuńqyrlaý tabany jerge tıip, turyq túsýi. Ol ekinshi dárejeli mánge ıe. Búk - asyqtyń ıirilgende dóńes jony ústine qarap, etpetinen jatyq túsýi. Ol úshinshi dárejeli mánge ıe. Shik - asyqtyń ıirilgende shuńqyr qursaq jaǵy ústine qarap, shalqasynan jatyq túsýi. Ol tórtinshi dárejeli mánge ıe.
