Balqashta AES salý boıynsha Qytaımen kelissóz júrgizgen joqpyz – Rınat Oqasov

ASTANA. KAZINFORM – «Qazaqstan atom elektr stantsııalary» JShS bas dırektorynyń orynbasary Rınat Oqasov Balqash irgesinen oryn tebý múmkin AES máselesi boıynsha Qytaıdyń kelisimin alý máselesi qalaı sheshilip jatqanyn aıtty.

Másele qaıdan shyqty?

Qazaqstannyń alǵashqy AES-i Almaty oblysy Jambyl aýdany Úlken kentiniń aýmaǵynda salynatyny týraly Úkimet qaýlysy shyqqan. Úlken kenti Balqash kóliniń irgesinde tur deýge bolady. Energetıkter bul tańdaýdy ońtústik óńirlerge AES óndirgen elektr qýatyn tasymaldaý jeńildeıtinimen, AES týrbınalaryn sýytý jumystaryn jeńildetýge yńǵaıly bolýymen baılanystyryp otyr. Alaıda Balqash kóliniń negizgi sýy bastaýy Qytaı aýmaǵynda jatqan Іle ózeninen keledi. Halyqaralyq norma boıynsha transshekaralyq ózen boıyna qandaı bir iri ınfraqurylym salý úshin sý boıyndaǵy elderdiń túgel kelisimin alý kerek. Sondyqtan Úlken kentine AES salý úshin Qytaıdyń kelisim bergeni qajet.

Qytaı kelise me?

«Qazaqstan atom elektr stantsııalary» JShS bas dırektorynyń orynbasary Rınat Oqasovtyń aıtýynsha, bul máselede qıyndyq bolmaýy kerek.

- Qazaqstan atom energetıkasy salasynda búkil halyqaralyq konventsııalardyń múshesi bolyp esepteledi. Bizdiń short-paraǵymyzda osy Qytaıdyń da korporatsııasy bar. Sondyqtan naqty AES salý máselesinde Іle ózeni boıynsha kelissóz júrgizgen joqpyz. Biraq bul máselede eshqandaı qıyndyq bola qoıady dep oılamaımyn, - dedi Rınat Oqasov.

Buǵan deıin AES salýǵa memleket kepildigimen qaryz tartylýy múmkin ekenin jazǵan edik.