Balqashta 8 jastaǵy balany aıaýsyz soqqyǵa jyqqan
QARAǴANDY. KAZINFORM — Balqash qalasynyń turǵyny kishkentaı ulyn eresek adam azaptaǵanyn málimdedi. Onyń aıtýynsha, segiz jastaǵy balany er adam aıaýsyz soqqyǵa jyqqan, saýsaqtaryn syndyrǵan jáne denesin kúıdirgen.
Oqıǵa týraly balanyń anasy áleýmettik jelide málimdegen. Ol tergeýdiń tym uzap ketkenin jáne kúdiktiniń polıtsııa men basqa da memlekettik organdarda tanystary bar ekenin alǵa tartady.
— Qoǵamnan beı-jaı qalmaýdy ótinemin. Ulyma orny tolmas zııan keltirildi, biz kináli adamnyń jazasyz qalýyna jol bermeýimiz kerek, — dedi áıel.
Qaraǵandy oblysynyń Polıtsııa departamenti bul oqıǵa boıynsha qylmystyq is qozǵalǵanyn rastady.
— Atalǵan derek boıynsha qylmystyq is tirkeldi. Qazirgi tańda tergeý amaldary júrip jatyr, birqatar saraptamalar taǵaıyndaldy jáne tergeý-jedel is-sharalary josparlanǵan, — dep habarlady Qaraǵandy oblysy PD baspasóz qyzmeti.
Kúdikti jumys isteıtin kompanııa da bul oqıǵaǵa qatysty óz pikirin aıtyp, alańdaýshylyq bildirdi jáne tergeýge barynsha kómek kórsetýge daıyn ekenin málimdedi. Kompanııa ókilderi qyzmetkerdiń kinási dáleldengen jaǵdaıda, onyń zań boıynsha jaýap beretinin atap ótti.
Atalǵan is boıynsha tergeý barysy quqyq qorǵaý organdarynyń baqylaýynda. Qoǵam jáne quqyq qorǵaýshylar oqıǵanyń odan arǵy damýyn jiti qadaǵalap otyr.
Eske salsaq, áleýmettik jelide Qyzylorda qalasynda kishkentaı balany ıt talaı jazdaǵan beınejazba taraǵan.