Balqashta 2 jasar qyzymen birge joǵalyp ketken er adam tabyldy
BALQASh. QazAqparat - Balqash qalasynda izdeýge jarııalanǵan 44 jastaǵy er adam men onyń 2 jasar qyzy tabyldy, dep habarlaıdy QazAqparat tilshisi.
14 mamyr kúni saǵat 00.20-da Balqash qalasynyń polıtsııa bólimine 37 jastaǵy áıel júgingen. Ol 44 jastaǵy kúıeýi eki jasar qyzymen birge 13 mamyrda tústen keıin úıden shyǵyp, qaıtyp oralmaǵanyn aıtqan. Sondaı-aq, joldasynyń uıaly telefony óshirýli turǵanyn jetkizgen.
Polıtsııa qyzmetkerleri anyqtaǵandaı, er adam otbasymen sońǵy ret 13 mamyr kúni saǵat 17.00 shamasynda baılanysyp, qyzymen birge úıine qaıtyp kele jatqanyn habarlaǵan. Osydan keıin ol kenet joǵalyp ketken. Keshke deıin kúıeýi men qyzyn kútken áıel, tún ortasynda polıtsııaǵa júgingen.
«Habar-osharsyz ketken er adam men balanyń ornalasqan jerin anyqtaý maqsatynda polıtsııa bóliminiń jeke quramy jáne oǵan qarasty barlyq qyzmetter baǵdarlandy. Bes izdeý toby quryldy, olar dereý qalanyń barlyq aýdandarynda izdeý jumystaryn júrgize bastady. Sondaı-aq, eriktiler men basqa da janashyr azamattar quqyq qorǵaý organdaryna kómek kórsetti», - deıdi Qaraǵandy oblysy Polıtsııa departamenti bastyǵynyń orynbasary Ábil Ábildın.
Іzdestirý is-sharalary barysynda joǵalǵan er adamnyń baılanystary pysyqtaldy, saıajaı jáne garaj massıvteri tekserildi. Sonymen qatar, qaladaǵy barlyq ýaqytsha qabyldaý mekemeleri tekserildi.
«Birneshe saǵattan keıin ótinish berýshiniń kúıeýi men qyzy ózderi qaıtyp kelgen. Belgili bolǵandaı, er adam tanysyn kezdestirip, sonyń úıinde túnep qalǵan. Osylaısha, ol eki jasar qyzymen kenetten joǵalyp ketýiniń saldary týraly oılamaı, jaýapsyzdyq tanytqan», - dedi polıtsııadan. .
