Balqash jaǵalaýyn abattandyrýǵa qosymsha qarajat kerek - alqa otyrysy

BÝRABAI. QazAqparat – Alakól jaǵalaýyn nyǵaıtý men Balqash jaǵalaýyn abattandyrýǵa qarajat kerek. Bul týraly Mádenıet jáne sport vıtse-mınıstri Erjan Erkinbaev aıtty, dep habarlaıdy QazAqparat tilshisi.

«Týrızm boıynsha ınfraqurylymdyq jobalardy iske asyrý jalǵasýda. Alaıda, 380 mlrd teńge somasyna 49 jobany qarjylandyrýǵa qosymsha qajettilik bar. Bul jobalyq-smetalyq qujattamasy daıyn, biraq qarjylandyrylmaǵan jobalar. Olardyń ishinde Imantaý-Shalqar kýrorttyq aımaǵynda avtojol salý, Alakól jaǵalaýyn nyǵaıtý, Balqash qalasyndaǵy jaǵalaýdy abattandyrý jumystary bar», - dedi Erjan Erkinbaev týrızmdi damytý máseleleri jónindegi kóshpeli alqa otyrysynda.

Spıkerdiń aıtýynsha, bul jobalardy iske asyrý týrızmdi damytý úshin óte mańyzdy. Osy jumystar arqyly óńirlerdiń ınvestıtsııalyq tartymdylyǵy da artady.

Aıta keteıik, Býrabaı kýrortynda QR Mádenıet jáne sport mınıstrliginiń týrızm salasyn damytýǵa arnalǵan keńeıtilgen alqa otyrysy ótip jatyr. 2022 jyly Qazaqstannyń barlyq oblysynda týrızm kórsetkishteri ósken.