Balqash jaǵalaýyn abattandyrýǵa 4 mlrd teńgege jýyq qarajat jumsalmaq
Negizgi alleıanyń eni - 6-7 metr, trotýarlardyń eni 2-4 metr bolady. Jańa alańdarda sur jáne qyzǵylt sary tústi beton plıtkalary paıdalanylady.
Abattandyrý jumysy sáýir aıynda bastalady. Jáne ol eki kezeńde ótedi.
«Abattandyrylǵan jaǵalaý – ınvestorlardy, týrıster men demalýshylardy tartý, týrızmdi damytý úshin mańyzdy. Jaǵalaýdy abattandyrý sheńberinde kók, aqshyl kók, aqshyl sary jáne jasyl tústi rezeńke-kaýchýk jabyny bar balalar oıyn jáne sport alańdaryn jabdyqtaý josparlanýda. Balalar oıyn keshenderi ár túrli jas toptaryna arnalǵan. Boıalǵan asfaltbeton jabyny men velosıped turaǵy bar eni úsh metr zamanaýı velosıped joly paıda bolady», – dedi Balqash qalasynyń TKSh bólimi.
Sondaı-aq, jaǵalaýda shaǵyn arhıtektýralyq formalar, kóleńkeli galereıalar, samaljaılar, pergolalar, saıabaqtaǵy aǵash oryndyqtar, beton negizindegi oryndyqtar, ýrnalar, músinder, aǵash átkenshekter, sporttyq jabdyqtar men kóshe trenajerleri, sýburqaqtar ornatylady.
«Qalalyq jaǵajaıdyń jaǵalaý aımaǵyn abattandyrýdyń negizgi qaǵıdasy qalalyq ortanyń ekologııalyq aımaǵyn qorǵaý jáne saqtaý jáne Balqashta týrızmdi damytý bolyp tabylady, onsyz jobalaý jáne qurylys jumystary júzege asyrylmaýy tıis», – dep atap ótti TKSh bólimi.
Birinshi aımaqty qaıta qurýmen «Balqash jibek joly» kompanııasy aınalysatyny belgili boldy.
Jaǵalaýdyń osy ýchaskesin jóndeýge respýblıkalyq bıýdjetten 1 mıllıard 976 mıllıon teńge bólinedi.
Onyń ishinde 1 mıllıard 504 mıllıon teńge qurylys-montajdaý jumystaryna, 350 mıllıonnan astamy jabdyqqa jumsalady.
Jumys sáýir aıynda bastalyp, 9 aıǵa sozylady.
Tehnıkalyq qadaǵalaýdy «Qyzmet-Injınırıng» JShS (Qaraǵandy qalasy), avtorlyq qadaǵalaýdy – «ENVICON-A» JShS (Envıkon-A) (Almaty qalasy) júzege asyrady.
Ákimdiktiń málimetinshe, jaǵalaýdyń ekinshi bóligin jóndeýge shamamen 2 mıllıard teńge jumsalmaq.
Bul aýmaq úlkenirek jáne 9 gektardy quraıdy. Jaǵalaýdyń bul bóliginde qandaı jumystar oılastyrylǵany ázirge belgisiz.
