Balqash jaǵalaýyndaǵy jer ýchaskesi memleketke qaıtaryldy

ASTANA. KAZINFORM – Memleket basshysynyń óńirdiń týrıstik klasterin damytý jónindegi tapsyrmasyn oryndaý aıasynda QR AShM-niń Qaraǵandy oblysy boıynsha Jer resýrstaryn basqarý departamenti buryn berilgen, biraq ıgerilmegen jer ýchaskelerin Balqash kóli jaǵalaýynan týrıstik nysandar salý úshin memlekettik menshikke qaıtarý boıynsha júıeli jumys júrgizip jatyr. 

Jospardan tys tekserý nátıjesinde Toranǵalyq aýylynda ornalasqan, aýmaǵy 0,5 gektardy quraıtyn, demalys aımaǵyn abattandyrý jáne týrıstik qyzmetter kórsetý úshin berilgen, biraq kóptegen jyl boıy paıdalanylmaǵan jer telimi anyqtaldy. Kásipkerge ýchaskeni ıgerý týraly nusqama berildi.

Nusqamanyń oryndalmaýyna baılanysty departament kásipkerge aıyppul salyp, jer ýchaskesin májbúrli túrde alyp qoıý týraly talappen sotqa júgindi.

Qaraǵandy oblysynyń mamandandyrylǵan aýdanaralyq ekonomıkalyq soty JRBD talaptaryn tolyq qanaǵattandyryp, jer telimin májbúrlep alyp qoıý jáne ony keıinnen saýda-sattyqqa (aýktsıonǵa) qoıý týraly sheshim qabyldady.

Sot sheshimi zańdy kúshine endi.

Budan buryn Shymkentte 341 jer ýchaskesi memleket menshigine qaıtarylǵanyn jazdyq.