Balqash jaǵalaýyna kóligimen kirip, demalýshylardy shoshytqan júrgizýshi 10 táýlikke qamaldy
ASTANA. KAZINFORM – Balqash kóli jaǵalaýyndaǵy demalys aýmaǵyna kirip ketip, jaǵajaıda jatqan adamdardyń tynyshtyǵyn buzyp, olardyń ómirine qaýip tóndirgen júrgizýshi ustaldy, dep habarlaıdy Polisia.kz.
-Polıtsııa qyzmetkerleri Almaty oblysy Jambyl aýdanyndaǵy Balqash kóliniń jaǵalaýynda, adamdar, sonyń ishinde kishkentaı balalar shomylyp júrgen kezde Mercedes-Benz avtokóligimen júrip, adamdardyń ómirine qaýip tóndirgen 40 jastaǵy júrgizýshini anyqtady. Ol óz áreketimen aınalasyndaǵylardyń ómiri men densaýlyǵyna qaýip tóndirgen,-delingen habarlamada.
Quqyq buzýshy Taraz qalasynyń turǵyny Nurlan Isaev bolyp shyqty. Sot sheshimimen ol 10 táýlikke ákimshilik qamaqqa alyndy. Avtokólik arnaıy turaqqa qoıyldy.
Polıtsııa adamdardyń ómiri men densaýlyǵyna qaýip tóndiretin kez kelgen áreketke qatań tosqaýyl qoıylyp, kináliler zań talaptaryna sáıkes jaýapqa tartylatynyn eskertedi.
Osyǵan deıin Semeıde «Zarıa» jaǵajaıyn búldirgen vandaldar jaýapqa tartylatyny týraly jazdyq.
