Balqash, Ulytaý, Qarqaraly - Qaraǵandy oblysynda týrızm damytylatyn aımaqtar
QARAǴANDY. QazAqparat - Qaraǵandy oblysynda týrızm damytylatyn úsh baǵyty anyqtaldy. Bul, týrıstik kartanyń TOP-10 nysandaryna engen Balqash kýrorttyq aımaǵy, Ulytaý tarıhı-mádenı ortalyǵy jáne Qarqaraly aýdanynyń kýrorttyq aımaǵy, dep habarlaıdy QazAqparat tilshisi.
Balqash qalasynda ótken forýmda týrıstik ındýstrııany damytý, sheteldikterge elimizdiń kórikti jerlerin kórsetý jáne ishki týrızmdi tartymdy etý máseleleri talqylandy.
«Bul forýmdy óńirdegi týrızmdi damytýdyń negizgi núktesi bolyp tabylatyn - Balqash mańynda ótkizý týraly sheshim qabyldadyq. Qazirgi tańda statıstıka kelesideı: oblysta qonaqúıler, demalys aımaqtary men úıler, jazǵy lagerler, pansıonattar jáne basqa 253 nysan demalysty uıymdastyrý boıynsha qyzmet kórsetedi. Olar jylyna 280 myńnan astam adamdy qabyldaıdy. Biz jyl saıyn týrıstik núktelerimiz mıllıon týrısti qabyldaıtyndaı deńgeıge jetýdi maqsat etip otyrmyz. Al eger ol kórsetkish osy deńgeıden asyp túser bolsa, bul shyn máninde, tabysty bolady dep oılaımyn», - dedi Qaraǵandy oblysy ákiminiń orynbasary Almas Aıdarov aımaqtyq týrıstik forýmnyń plenarlyq otyrysynda.
Onyń aıtýynsha, baı tarıhı-mádenı muramyz, kıeli oryndardyń bolýy, oblystyń geografııalyq ornalasýy, sondaı-aq kóptegen biregeı sáýlet eskertkishteri belsendi týrızmniń, saýyqtyrý, etnografııalyq jáne ekologııalyq demalystyń barlyq túrlerin damytýǵa úlken múmkindikter ashady.
Balqash kýrorttyq aımaǵyn damytý boıynsha bas jospardy Mc&Kensey konsaltıngtik kompanııasy ázirledi. Demalys aımaǵynyń quramyna Balqash, Aqtoǵaı aýdanynyń Torańǵalyq jáne Shubar-Túbek kentteri jáne Prıozersk qalasy kiredi. Balqash jaǵalaýynda 53 qonaqúı men demalys orny ornalasqan. Balhash mańynda jyl saıyn jaǵajaı demalysyna shamamen 80 myń adam keledi. Oblystyq kásipkerlik basqarmasynyń basshysy Tatıana Ablaevanyń aıtýynsha, 2030 jylǵa qaraı týrıstik aǵyndy 4 esege arttyrý áleýeti bar.
Ol kýrorttyq aımaq aýmaǵynda ınfraqurylymdy damytý jobalary týraly toqtala ketti. Memlekettik qoldaý arqyly elektr jelilerin, sý qubyrlaryn salý, jaǵajaı aımaqtary men jaǵalaýlardy jaılastyrý josparlanýda.
Forým qatysýshylaryna 2019-2025 jyldarǵa arnalǵan týrıstik salany damytýdyń memlekettik baǵdarlamasy tanystyryldy. Bul qujat bıylǵy 30 mamyrda bekitildi. El Premer-Mınıstriniń tapsyrmasy boıynsha baǵdarlamany iske asyrý úshin jobalyq keńse de quryldy. Týrıstik salany damytýdaǵy jańalyqtar men memlekettik qoldaýdyń basty sharalary týraly «Kazakh Tourism» ulttyq kompanııasy» AQ Basqarma tóraǵasynyń keńesshisi Erkebulan Hasenov baıandady.
Al Nur-Sultan qalasyndaǵy týrfırma jetekshisi Tatıana Vernıtskaıanyń sózinshe, týrısterdi halyqtyń salt-dástúri, tarıhy qyzyqtyrady.
«Іshki týrızm máselesi basty nazarda boldy. Bul salada biz kóp jyldan beri jumys istep kelemiz, sheteldik týrıster úshin týrlar quramyz. Bizde biregeı tarıh jáne tabıǵaty ásem jerler bar. Shet memleket týrısterine kórsetip, maqtan tutarlyq mekender de jeterlik. Halqymyzdyń turmysy, ómir salty, ulttyq taǵam - osynyń barlyǵy sheteldikterge qyzyqty jáne olar Qazaqstanǵa týrıst retinde kelgisi keledi. Biraq osynyń bárin kórsetý jáne laıyqty usyný úshin tyrysý kerek. Sheshilýi tıis máseleler áli de jetkilikti: joldyń nashar bolýy, qalypty dárethanalardyń bolmaýy, kásibı gıdterdiń jetispeýshiligi. Qoǵam ósip keledi, Qazaqstandyqtar álem boıynsha kóp júredi jáne sheteldegideı demalý úshin jaqsy jaǵdaı jasaýdy qalaıdy», - dedi ol.
Onyń aıtýynsha, aqparattyq týr kezinde Balqash mańyn aralaı kele, týroperatorlar Aqtoǵaı aýdanynda erekshe áserge ıe bolǵan. Sebebi onda qonaqtardy ımprovızatsııalanǵan aýylda qarsy alyp, qazaq mádenıeti men asúıin kórsetti. Bul etnotýrızmdi damytýǵa arnalǵan naǵyz qazyna.
Otandyq týrızmdi damytýǵa atsalysatyn týrıstik fırmalardyń ókilderi Balqash - tek jaǵajaılyq demalys qana emes ekenine senimdi. Olar týrısterdi tartýdyń birneshe joldaryn usynady. Bul úshin baǵdarlama quryp, jaǵdaı jasaý kerek, dep atap ótti forýmǵa qatysýshylar.
