Balqash turǵyny ıtiniń kúshikterin 5-qabattan laqtyryp jiberdi
QARAǴANDY. QazAqparat - Balqash qalasynyń turǵyny ıtiniń alty birdeı kúshigin besinshi qabattan laqtyryp jibergen, dep habarlaıdy «QazAqparat» HAA tilshisi.
Seıfýllın kóshesinde turatyn turǵynnyń ıti jeti kúshik týǵan. Turǵyndardyń aıtýynsha, olardyń bireýin ıesi ózine qaldyryp, qalǵan altaýyn bıiktikten laqtyryp, óltirmekshi bolǵan. Oqıǵany aýlada júrgen jetkinshekter kórip, ata-anasyna aıtyp kelgen.
«Biz dereý tómenge túsip, ólip jatqan kúshikterdi kórip qorqyp kettik. Tórt kúshik ólgen, qalǵan ekeýi solardyń ústine qulaǵandyqtan, aman qalypty. Biz olardy alyp ketip, jaraqat alǵan jerlerin emdep jatyrmyz», - dedi kórshiler.
Janýarlardy qorǵaý birlestiginiń eriktileri men polıtsııanyń ýchaskelik ınspektory kúshikter laqtyrylǵan besinshi qabattaǵy páterge kóterldi. Alaıda, úı ıesi esikti ashpaı qoıǵan.
Buǵan deıin osyǵan uqsas oqıǵa Qaraǵandyda da bolǵan edi. Er adam óz úıiniń aýlasynda ıtin kúrekpen urǵan. Qan-josa bolǵan ıtti eriktiler qutqaryp qalǵan. Qatty soqqydan jábirlengen ıttiń fotosy men vıdeosy áleýmettik jelilerde jarııalanǵan bolatyn.
