Balqash turǵyndary 58 zańsyz qoqys úıindisiniń kózin joıdy
Senbilikti osymen ekinshi jyl qatarynan Balqashtyń belsendi turǵyny Anar Adambekova uıymdastyryp, sharaǵa bastamashy boldy. Ol pikirles adamdarmen, eriktilermen jáne memlekettik organdardyń qyzmetkerlerimen birge jaǵalaýdy, alleıalardy, eskertkishter men basqa da qoǵamdyq oryndar mańyndaǵy aýmaqtardy tazartýmen aınalysady.
«Ótken jyly senbilik ótkize bastaǵanda, adamdar bul bir rettik aktsııa dep oılady. Al qazir qala turǵyndary jaǵalaýdy jáne basqa da jerlerdi únemi tazalap otyratynymdy biledi. Jáne bul PR úshin emes. Men qalanyń taza bolǵanyn qalaımyn. Qala turǵyndaryn tazalyqty saqtaýǵa, qoqysty jınaýǵa shaqyramyn. Meniń qaladaǵy belsendiligime baılanysty olar meni qazirdiń ózinde tanıdy», – deıdi belsendi azamatsha.
Anardyń kúsh-jigeriniń arqasynda jaqynda jaǵalaýda eki qoqys konteıneri ornatyldy. Olarǵa qyzmet kórsetýmen jergilikti qoqys shyǵarýshy kompanııa aınalysady.
«Men ákimge qabyldaýǵa jazylyp, barlyq usynystarymdy oǵan jazbasha túrde jiberdim. Biraq konteınerlerdiń ornatylǵany meni qýantady. Sondaı-aq, men jaǵalaýda beınekameralar, profılaktıkalyq bılbordtar paıda bolǵanyn, al qoqys polıgondary týraly áleýmettik rolıkter jergilikti telearnada kórsetilip turǵanyn qalaımyn. Ol úshin turǵyndar arasynda beınerolıkter baıqaýyn ótkizýdi usynǵym keledi», – dep atap ótti Anar Adambekova.
Eki aı ishinde Anar bastaǵan belsendi balqashtyqtar 58 ruqsat etilmegen qoqys ornyn joıyp, 290 gektardan myń tonnadan astam qoqys shyǵardy. Senbilikke 59 tehnıka jumyldyryldy.
«Qalada áli de lastanǵan jerler kóp. Bul - óte mańyzdy másele. Birlesken kúsh-jigermen biz ony sheshýge tyrysamyz. Senbilikke qatysýshylardyń barlyǵyna alǵysymdy bildiremin», – deıdi Balqash qalasynyń ákimi Oraz Táýirbekov.
