Balqash turǵyndary masanyń qaptap ketýi saldarynan serýendeı almaı qaldy
ASTANA. KAZINFORM - Kýrorttyq Balqash qalasynyń turǵyndary qaptaǵan masalardan mezi boldy. Olar, ásirese keshki ýaqytta syrtqa shyǵýdyń múmkin emestigine shaǵymdanýda, dep habarlaıdy Kazinform agenttiginiń tilshisi.
Turǵyndardyń aıtýynsha, masalardyń top-tobymen shabýyl jasaýy saıabaqtarda, skverlerde jáne alańdarda jıi baıqalady. Kúndizgi aptap ystyq pen keshki ýaqytta masalardyń kóptigine baılanysty kóptegen adam múldem syrtqa shyqpaýdy jón kórip, balalardy da dalaǵa jibermeı otyr.
Áleýmettik jeli qoldanýshylary masaǵa toly jaǵalaýdyń vıdeolaryn bólisýde.
Balqash qalasynyń ákimdigi sáýir jáne mamyr aılarynda sanıtarlyq óńdeý jumystary júrgizilgenin, alaıda onyń ýaqytsha ǵana nátıje bergenin málimdedi.
— Qala aýmaǵynda dezınsektsııa jáne deratızatsııa jumystary josparly túrde turaqty júrgiziledi. Bıyl sanıtarlyq óńdeýdiń eki kezeńi ótti: alǵashqysy — 23 sáýirde, ekinshisi — 20 mamyrdan bastap zııankesterdiń shoǵyrlanǵan jerlerinde júrgizildi, — dedi Balqash qalalyq TKSh bólimi basshysynyń orynbasary Asylmurat Túsipov.
Sanıtarlyq ahýaldyń nasharlaýyna baılanysty qalalyq qyzmetter óńdeýdiń úshinshi kezeńin ótkizý týraly sheshim qabyldady. Qazir merdiger uıym qoldanylatyn preparattardyń quramyn qaıta qarap jatyr, onyń da tıimdiligin arttyrý kózdelýde.
— Jańa quraldardy tańdaǵanda zııankesterdiń tózimdiligi, qalalyq ortanyń erekshelikteri men aýa raıy jaǵdaılary eskeriledi. Barlyq preparattar sanıtarlyq-epıdemıologııalyq qyzmetpen kelisiletin bolady. Óńdeý jumystary jaǵalaýlardy, jaýyn sýy aǵatyn naýalardy, jertólelerdi, qoqys jınaý oryndaryn jáne basqa da nysandardy qamtıdy, — dep qosty ákimdik.
Ákimdik ókilderi turǵyndardy sanıtarlyq talaptardy saqtaýǵa jáne masalardyń shoǵyrlanǵan oshaqtaryn anyqtaǵan jaǵdaıda habarlasýǵa shaqyrdy.
Buǵan deıin jazǵanymyzdaı, Pavlodarda da aýyl turǵyndaryn sary masa men shirkeı talap jatyr.